سيلين طفلة الضمور العضلي تجمع 20 مليون جنيه لشراء الحقنة الأغلى عالميا
قال أيمن علي، والد الطفلة سيلين، المصابة بالضمور العضلي الشوكي، إنه تم جمع 20 مليون جنيه ضمن حملة التبرع، لشراء الحقنة الأغلى في العالم.
سيلين تجمع 20 مليون لشراء حقنة الضمور
وأضاف في تصريحات خاصة لـ القاهرة 24: جمعنا 50% من المبلغ لسه فاضل 20 مليون جنيه كمان.
وكشف أيمن علي، والد الطفلة عن آخر تطورات حالتها الصحية، مؤكدًا أنها في تدهور كبير.
آخر التطورات الصحية لسيلين
كما أوضح علي: سيلين حاليًا عندها صعوبة في التنفس، والبلع، ونتاخد جلسات أكسجين كل شوية.
وأضاف الأب: حالتها بتتدهور بشكل كبير، وبنعملها كل شوية تحاليل وأشعة، والحل الوحيد حاليًا أنها تأخد الحقنة في أسرع وقت.
وكتبت الصفحة الخاصة بحملة التبرع لسيلين: أول مرة منبقاش فرحانين، واحنا بننزل الاستعلام، كان نفسنا يا سيلين نقول إن الـ 20 دي بقت 40 والمبلغ يكمل.
وأشارت الصفحة في منشور: يمكن في وقت تاني كنا نبقى طايرين من الفرحة واحنا شايفين إن في 6 ملايين اتجمعوا في أسبوع، إنما دلوقتي الوقت مش في صالحنا وبنسابق الزمن عشانك.
وواصلت: الحمد لله وصلنا نص المشوار بيكم وهنكمل برضه بيكم، بس سيلين لازم خلاص تاخد الحقنة في أسرع وقت، ده كلام كل الدكاترة المتابعين للحالة.
واستكملت: الحقوا سيلين وخلوا الاستعلام الجاي المبلغ كامل، مش عاوزين نعلن استعلام تاني غير الـ 40 مليونا، مضيفة: ساعدونا وناشدوا كل المشاهير والجاليات المصرية فالخارج والصفحات والجروبات الكبيرة.
واختتمت الصفحة المنشور قائلة: اللهم كن لها ومعها، فإنه لاحول ولا قوة لنا ولها إلا بك، وارنا يا رب عجائب قدرتك في إنقاذها.
