عواطف حلمي: شغلتنا ممتعة والفن جميل.. وكل فنان عنده خيار يمشي شمال أو يمين
تحدثت الفنانة عواطف حلمي عن رأيها في تحريم البعض للفن، إلى جانب حديثها عن علاقتها بزوجها الراحل الفنان مجدي رزق.
وقالت عواطف حلمي في تصريحات لـ القاهرة 24: الحلال بين والحرام بين وكل واحد حر، ربنا مدينا مخ أننا نقبل الصح ونرفض الغلط، وكل فنان لديه خيار يمشي شمال ولا يمين.. أنا عن نفسي عاوزة أمشي مع ربنا على اليمين وشغلتنا جميلة وممتعة والفن جميل، وأنا ما حاولتش أنصح حد من زملائي لأني مش داعية إسلامية وكل واحد حر وربنا اللي بيحاسب لكن بنصح نفسي.
علاقتها بزوجها الراحل
وأشارت عواطف حلمي إلى انها تمكث بمنزل زوجها ولم تتركه منذ خمسين عامًا، مضيفة: بكون على حريتي وبقى لي 50 سنة صعب عليا اسيبه وبقضي وقتي في قراءة القرآن ومع ربنا وكرم ربنا عليا كبير ومفيش حاجة مضيفاني ونعم ربنا عليا لا تعد ولا تصحى.
وتابعت عن علاقتها بزوجها: عشرة خمسين سنة كان فنان جميل وقدم مسرحيات كتير، وقبل وفاته تعب، ورحيله بالنسبة لي كان صعبًا جدًا ربنا ما يكتبها على حد وبقيت أقول الحمد لله اني راعيته قبل وفاته لو أنا كنت مت قبله كان هيتعب والحمد لله مات راضي عني.
تكريمها من مهرجان القاهرة للدراما
من ناحية أخرى، أعربت عواطف حلمي عن سعادتها بتكريمها من مهرجان القاهرة للدراما في دروته الأولى، والذي حرص على تكريم الفنانين المهمشين، إذ قالت: سعيدة جدًا بتكريمي، لأن دي أول حاجة تحصل للفنانين أصحاب الأدوار التانية لأننا كنا مهمشين وماحدش بيسمع عننا حاجة، وقبل الفيس بوك لو حد مات ما حدش هيعرف غير بعد مدة كبيرة، فتكريمنا في المهرجان أعطى لنا حقنا.
واستكمل: ماليش في المهرجانات لأنها ليها ناس معينة، فكتر خير دكتور أشرف زكي أنه فكر فينا، وكده كده ربنا مكرمني ولما بمشي في الشارع الناس كلها بتحبني والحمد لله التكريم، خلاني أشوف حبايبي وكانوا مرحبين بيا، وحسيت إنها مكافأة نهاية الخدمة، والحمد لله شبعانة فينًا وعملت كل اللي كان نفسي به وراضية بمشواري الفني، وربنا أنعم عليا الحمد لله، وأتمنى ربنا يتممها عليا ويحسن ختامي
