فاروق فلوكس يرد على محمد رمضان: لسانه فالت ولا أتمنى العمل معه أبدًا.. وميعرفش يعمل دور صبي الرقاصة
رد الفنان فاروق فلوكس، على تصريحات الفنان محمد رمضان الأخيرة، وسخريته منه لتجسيد دور صبي راقصة، مشيرًا إلى أنه لن يتمكن من إتقان الشخصية مثله.
وقال فاروق فلوكس، في تصريحات لـ القاهرة 24، إنه يحترم رأيه، معلقا: رأيه فيّا يُحترم، لكن أنا مش بعمل حاجة خارجة، أنا لما بعمل عمل وأتقنه والناس تصدقه ده حاجة تانية.
فاروق فلوكس: بحترم رأي محمد رمضان لكني ماعملتش حاجة خارجة
وأضاف فاروق فلوكس: عملت دموع في عين وقحه، بطولة الأستاذ عادل إمام، ودي لغة الفن اللي مابتمشيش بنوعية واحدة، جميع أدواري اللي قدمتها على مدار مشواري الفني بقدم شخصيات مختلفة، وهي دي اللي الناس بتصدقها.
واستكمل فاروق فلوكس: لما أعمل شخصية صبي رقاصة -إشارة إلى دوره في فيلم الراقصة والسياسي- لا بد أن تكون الشخصية بها مضمون، لو هو مش فاهم في ده هو حر، لكني أنا مجرحتش حد خالص، ولا المشاهد، ولكني أجدت تجسيد الشخصية.
فاروق فلوكس: مش عارف محمد رمضان بيهاجمني ليه
وعن أسباب هجوم محمد رمضان عليه، قال فاروق فلوكس: أنا مش عارف هو بيهاجمني ليه، هذه الأمور نسأل فيها عند ربنا هو اللي هيحاسب من ضرّني.
وأردف فاروق فلوكس تصريحاته قائلا: ناس كتير بيهاجموني بلا سبب، ومش عارف محمد رمضان بيهاجمني ليه، هو لو جتله شخصية زي اللي أنا قدمتها مش هيعرف يعملها بالإتقان ده، لأن هو كتير بيظهر واد شقي في جبل وهو شاطر في كده لكن مش بينوع أدواره.
وواصل فاروق فلوكس حديثه قائلا: هو ممثل كويس لكن لسانه فالت، مشيرا إلى أنه لا يتمنى العمل معه أبدا.
واستكمل: ناس في الوسط عمري ما أشتغل معاهم وهو واحد منهم، مش معنى كده إني أحسن منه لا أبدا، أنا مبحبش نوع الأعمال بتاعته.
تصريحات محمد رمضان
وسبق، وهاجم الفنان محمد رمضان، الفنان فاروق فلوكس، خلال لقائه الإعلامية نجوى إبراهيم المذاع على قناة النهار، إذ قال: فيه فنان كبير عمل أشياء أرفض أن أفعلها، وكان بيعمل أدوار صبي عالمة ولو هشحت مش هبقى زيه، رغم أن هذا الفنان قدير.
