سماح أنور: قُلت لـ هاني خليفة شكرًا إنك اتولدت بسبب عبقريته في مسلسل الليلة واللي فيها
تحدثت الفنانة سماح أنور، عن مسلسل الليلة واللي فيها، الذي يُعرض حاليًا عبر إحدى المنصات الإلكترونية والذي حقق نجاحا كبيرا، معربة عن سعادتها الكبيرة بتعاونها مع مخرج العمل هاني خليفة.
وقالت سماح أنور، في تصريحات تلفزيونية: إحنا مجتمعاتنا بتتميز بشكل الحماة اللي بتتدخل في كل شيء، لإن الحب والاهتمام عندنا بيُترجم بإن دا تدخل، وده خطأ شائع، والحموات إحنا سميناهم حموات عشان كل أم بتحامي لأولادها، وشخصيتي في مسلسل الليلة واللي فيها، مش عاجبة زوجة ابنها لأنها بتدخل في كل شيء، وشخصية ابني في العمل طالع إنه ابن أمه شوية، أو أتربى من شخصية متسلطة.
وتابعت سماح أنور، متحدثة عن مخرج العمل هاني خليفة، قائلة: الأستاذ هاني خليفة كان هو السبب إننا منعملش الشكل التقليدي للحماة، لإني أنا الحقيقة كنت مفكرة فيها كده، ولكن هو قالي لأ ده عادي، أنا مختارك إنتي عشان عايزين نعمل حاجة غير متوقعة، وقالي الشخصية دي بتحب ابنها فعلًا ومش عاجبها مراته، وست تفكيرها قديم فعلًا، ولما لقت إن مرات ابنها هتطلق خلاص اتخضت، وبدأت تحل بالحنية لأنها خايفة على بيت ابنها.
وأوضحت: كان فيه بعض المشاهد في مسلسل اللية واللي فيها بنعيدها 20 مرة، عشان الأداء ونوصل للنتيجة اللي عايزينها، وكان فيه مشهد عدناه 6 مرات عشان تعبيرات وشي وأنا نايمة في المشهد كانت مشدودة، إحنا كنا بنزل مع مخرج شايف كل التفاصيل بعد العرض، ودي حاجة أنا مشفتهاش في مشواري الطويل جدًا غير يمكن نص مرة.
و أضافت سماح أنور، أنها كانت تبحث عن مخرج مثل المخرج هاني خليفة منذ وقت طويل، قائلة: أنا قُلت لـ هاني خليفة شكرًا إنك اتولدت لإني بدور عليك من زمان أنا مكنتش عارفة إنك موجود، وأنا من معجبينه أصلًا، كان عبقري في المسلسل.
مسلسل الليلة واللي فيها
مسلسل الليلة واللي فيها بطولة النجوم: زينة، محمد شاهين، سماح أنور، علاء مرسي، شيما الشريف، مطرب الراب أبيوسف، من تأليف محمد رجاء، وإخراج هانى خليفة، والعمل مكون من 6 حلقات، عرض على إحدى المنصات الإلكترونية، ومن المنتظر عرض الحلقة الأخيرة.
