تدهور الحالة الصحية لسيلين طفلة الضمور العضلي.. ووالدتها: جالها التهاب رئوي ولازم تاخد الحقنة
قالت رضوى حمدي، والدة الطفلة سيلين أيمن، المصابة بالضمور العضلي الشوكي، إن حالة طفلتها الصحية تدهورت بشدة، وهي في حاجة شديدة للحصول على الحقنة الأغلى في العالم.
تدهور الحالة الصحية لسيلين طفلة الضمور العضلي
وأضافت والدة الطفلة في تصريحات خاصة لـ القاهرة 24: تعبت أوي إمبارح الصبح، وجالها التهاب رئوي، واتحجزت كام ساعة في المستشفى، وفضلت على جهاز تنفس.
وتابعت رضوى: مكنتش عارفة تتنفس لأن المرض بيأثر على التنفس بشكل كبير، وضهرها هو السبب، لأن ضهرها بقى متقوس، وده مأثر على الرئة.
وواصلت والدة الطفلة سيلين: عشان كل ده يتعالج محتاجة الحقنة في أسرع وقت خلال الفترة دي بأسرع ما يمكن، عشان تتلحق، وسيلين بقى عندها سنة و3 شهور، وحالتها في تدهور مستمر.
وأكملت: الالتهاب الرئوي من أعراض المرض، وكل يوم بيظهر عليها أعراض جديدة، لحد ما بيوصل للقلب وساعتها خلاص، بتحصل الوفاة لا قدر الله، مؤكدة أنه تم جمع 12 مليون فقط من مبلغ الحقنة الأغلى في العالم، والتي تُقدر بـ 40 مليون جنيه.
واختتمت والدة سيلين: عندي أمل في المصريين أنهم يقدروا يجمعوا 28 مليون جنيه، عشان سيلين تاخد الحقنة وتخف.
وفي وقت سابق، حلت أسرة سيلين ضيفة في حلقات برنامج صاحبة السعادة، مع الفنانة إسعاد يونس، التي دعمت حملة التبرع للطفلة، لشراء الحقنة.
