هدى رمزي: كورونا ضيعتني.. وبحن للتمثيل بسبب سهير رمزي
أعربت الفنانة هدى رمزي عن حنينها للعودة لمجال التمثيل مرة أخرى، بعد غيابها لفترة طويلة تصل لأكثر من عشرين عاما.
وقالت هدى رمزي في تصريحات تلفزيونية، أتواصل دائمًا مع الفنانة سهير رمزي ونورا وبوسي، وأقول لهم اعتبروا إن عيبي الوحيد هو عدم حبي للتليفون؛ لأنني أشعر بأنه يقتحم الخصوصيات.
وأضافت: أكيد بحن للتمثيل ولأيام جيلي، وبتخض على سهير رمزي، هي حبيبتي أوي، وكانت بتعمل مسلسل مع هاني رمزي في الأيام اللي فاتت وكنت ببقى مخضوضة عليها لما ترجع الساعة 8 الصبح وتتصل بيا تقولي لسه راجعة، وهاني رمزي من الناس اللي تحبي تشتغلي معاه.
وتابعت هدى رمزي: سهير رمزي صحت جوايا الحنين للتمثيل، ولكن المشكلة إني أرجع وأنزل من نظر الناس، مش عايزة أعمل حاجة والناس تقولي إيه اللي رجعها؟، لازم أشارك في عمل يليق بي ويعليني، مش عايزة أعمل أي حاجة وبس، ومبيتعرضش عليا أعمال لأني كنت مبتعدة تماما ومكنش فيه فرصة لحد يعرض عليا.
وأردفت هدى رمزي: زعلانة على المجال دلوقتي، وقتنا كان سهل تسمعي كلمة نجوم وعندنا فنانين عظام ومؤلفين ومخرجين ولكن مفيش نجوم، وكنا زمان فيه رائدين في مجال الفن، ولكن دلوقتي فيه قبلنا سوريا والأتراك والهند واحنا بعدين، ليه؟، ومن خلال متابعتي للفيسبوك بقيت بقول جيلي وحشني، ومفتقدة جدًا الحياة اللي كنت عيشاها مع جيلي، والناس دلوقتي معندهمش وقت، وكنا زمان فيه غيرة فنية بس بنتحرم بعضنا من أصغر عامل لأكبر نجم عشان كده بنتفرج على أفلام الأبيض وأسود وبنصدقها مع إن يمكن أداء الفنانين الحاليين متمكنين أكتر ولكن احنا كنا منورين أوي.
