صفية العمري: نازك السلحدار لم تضف لي شيئًا.. وشخصيتي خجولة لكن قدام الكاميرا بشوط
تحدثت الفنانة صفية العمري، عن أشهر أدوارها في مشوارها الفني، وهي شخصية نازك السلحدار، التي قدمتها في المسلسل الشهير ليالي الحلمية.
وقالت صفية العمري، عن شخصية نازك السلحدار، في تصريحات تلفزيونية: نازك السلحدار دي شخصيتي أنا، يعني أنا طول عمري كده من وأنا صغيرة ودي شخصيتي، نازك ماضفتش ليا حاجة، بالعكس أنا اللي ضفت ليها من روحي ومن شخصيتي أنا.
وتابعت حديثها، عن سر محافظتها على ستايلها المشهور التي عرفت به من بدايتها الفنية، قائلة: أنا شخصيتي وطريقتي كده معرفش أتغير ومعرفش أعمل حاجة مش بتاعتي، مبيليقش عليا إني أغير شعري وطريقة لبسي، ليا ستايل معين وشكل مبعرفش أغيره بحس إن مش أنا، كل واحدة في الجيل الجديد ليها شكل وستايل وشخصيتها مفش حد زي أو شبه حد.
كما كشفت صفية العمري، سبب عدم استمرارها في تقدم البرامج التلفزيونية، موضحة: أنا كان ممكن أقدم حاجات فيها شكل إنساني أكتر، لكن مش عارفة أنا وقتها كنت هعمل إيه، أنا وقت ما كانت المسابقة موجودة قدمت فيها ولكني مكنتش عارفة هقدم إيه، اللي خدني الفن أنقذني.
وتابعت: أنا معرفش أقدم برامج زي إعلاميين دلوقتي، إسعاد يونس لها شخصي لذيذة ولطيفة مينفعش حد يقلدها خالص، أنا بحب أوي المزيكا الكلاسيكية والأوبرا فكان ممكن أقدم برنامج عن الفن الراقي اللي يمشي مع شخصيتي.
وأضافت: ربنا سبحانه وتعالى بيختار كل حد في مكانه وأنا في مكاني، أنا شخصية خجولة جدًا مع إني لما بقف قدام الكاميرا بشوط، زي ما قال الفنان العظيم حسن الإمام، عملت معاه أول فيلم في حياتي، كنا بنعمل دوبلاج وقالي إيه ده دي ست غول، فقدام الكاميرا أنا ببقى واحدة تانية لأني بلبس الشخصية.
