شهيرة عن زوجها الراحل محمود ياسين: بنادي عليه كل يوم وبيرد عليا وباخد مهدئات عشان أنام
أعربت الفنانة شهيرة، عن فقدانها الشديد لزوجها الفنان الراحل محمود ياسين، مشيرة إلى أنها كانت طوال فترة زواجها منه تنادي عليه بالمساء قبل نومها، وما زالت تفعل هذه العادة حتى الآن.
وقالت شهيرة في لقاء تلفزيوني: بنادي عليه وبيتهيألي إنه بيرد عليا، الله أعلم يمكن تخيلات، بس لازم أنده عليه كل يوم قبل ما أنام، حتى أثناء مرضه كنت أنده عليه ويرد عليا، وللأسف مش عارفة أتخلص من العادة دي.
وأشارت شهيرة، إنها تلجأ للمهدئات في بعض الأحيان لكي تتمكن من النوم بعد وفاة زوجها محمود ياسين، قائلة: أنا مكنتش أعرف إني هبقى كده وفي الحالة دي، أنا متفاجأة من نفسي، مع إن كان عندنا مقدمات لرحيله في فترة مرضه، ولما حصل ورحل، كأن مكنش فيه أي مقدمات، ساعات باخد مهدئ علشان أنام.
وانهارت شهيرة، من البكاء أثناء حديثها عن الراحل محمود ياسين قائلة: مش قادرة أتجاوز وفاة محمود ياسين لحد دلوقتي ومش عارفة، وطبعا بحاول، وعلى صفحتي كل الفانز بيقولوا ليا وحشتنينا، لكن في الحقيقة محمود ما يتعوضش كزوج وإنسان مفتقدة حاجة كبيرة أوي في حياتي أنا مش مظبوطة ومحطمة.
وتابعت: جيت النهاردة عاوزة أخرج من الحالة اللي أنا فيها كل صحابي بيقولوا لي لازم تخرجي من الحالة وأني واحشة الناس، ولازم أبقى قوية شوية لأني ساعات بكون محطمة.
