بعد 15 عامًا.. شاب يفي بوعده ويعيد خاتم والدته: باعته عشان تدفع لنا مصروفات المدرسة
أمي باعت آخر خاتم دهب ليها من 15 سنة عشان تدفع لنا مصروفات المدرسة، والنهاردة أنا رجعت لها الخاتم تاني.. منشور متداول بين مستخدمي مواقع التواصل الاجتماعي لاقى رواجًا واسعًا، وسط إشادات بما فعله المهندس عمرو مطر لوالدته وفاءً لها.
عمرو يفي بوعده
يقول المهندس عمرو، في تصريح لـ القاهرة 24: كنت وقتها طفل صغير وحزين لما أمي باعت آخر خاتم دهب عندها، رغم إننا مكناش فقراء أوي، لأننا كنا في مدارس خاصة، بس الفكرة إن أمي تبيع دهبها عشان نكمل تعليمنا كانت لحظة صعبة، وكنت حزين جدا وقتها.
وتابع: من وقتها وأنا فاكر والموقف معلق معايا، والخاتم تمنه مش صعب أوي عليا، لأني الحمد لله شغال مهندس وماديا كويس، فاستغليت عيد ميلادها واشتريت لها خاتم بدله من نفس المحل.
هفرش الدهب تحت رجلها
وأكمل: بعد 15 سنة، فكرتها بالموقف وقلت لها: فاكرة وأنا صغير لما قلت لك هجيب لك بدل الخاتم ده، يلا بقى نجيبه، ووقتها قلت لها إنتي عايزة إيه، قالت لي عايزة عباية، ففكرتها بالموقف وقلت لها يلا نجيب بدله، قالت لي إنت لسه فاكر، قلت لها: أيوة لسه فاكرة، وهي راجعة كانت بتغني من فرحتها.
واستطرد عمرو حديثه مع القاهرة 24، قائلا: زمان أمي باعت الدهب عشاننا، ومستقبلا أنا هفرشه تحت رجلها إن شاء الله.
عمرو يعيد خاتم والدته
وكتب المهندس عمرو عبر صفحته على فيسبوك منشورا قائلا: لما كنت فى 6 ابتدائي روحت المدرسة أنا وأختى مرضيوش يدخلونا الفصل عشان مدفعناش المصاريف، وروحنا قلنا لأمي، ونزلت باعت آخر خاتم في إيدها ودفعتلنا المصاريف تاني يوم.
وأضاف: قولتلها يومها هجبلك زيه من نفس المحل اللي بعتيه فيه، قالتلي هتنسى لما تكبر، قولتلها أنا قلبي أسود شوية مبنساش.. قولتلك مبنساش يا قمراية كل سنة وإنت طيبة.
