ميار الببلاوي بعد انتقادها شيرين عبد الوهاب: لما أروح أعمل عمرة هقف عند الكعبة وهدعي لها
أكدت الإعلامية والممثلة المعتزلة ميار الببلاوي أنها بالفعل تنوي الذهاب لأداء مناسك العمرة لتستغفر عن كل شيء خاصة انتقادها للفنانة شيرين عبد الوهاب الذي كان دون قصد منها.
وقالت ميار الببلاوي، في تصريح لـ القاهرة 24: هعمل العمرة وهستغفر على أي حاجة عملتها مش موضوع شيرين بالأخص، هستغفر لو في أي شبهة غِيبة، متابعة: لكن أنا ما قتلتش قتيل، أنا نيتي كانت كويسة، لكن أنا واحدة ست بقدم برنامج ديني ما أقدرش آمر الناس بالبر وأنسى نفسي بالرغم أني كان قصدي خير.
وأضافت: اتعرضت لمضايقات وهجوم من ناس كتير واتشمت لأن شيرين ليها جمهور كبير بيحبها وفهموا الموضوع غلط خاصة أن البعض اقتطع كلامي، متابعة: لكن أنا ذكرت أيضًا أني بحبها وبحترمها وأنها واجهة لمصر.
هدعي لشيرين ربنا يهدي لها الحال
وتابعت: أول ما أروح العمرة هستغفر وهدعي لها ربنا يهدي قلبها ويصلح لها الحال ويؤجرها في مصيبتها ويلهمها الصواب ويخليها لولادها، مضيفة: هقف عند الكعبة وهنقي سريريتي من الموضوع ده تمامًا وادعي لشيرين سوا وأنا ساجدة في الروضة عند رسول الله.
واستكملت: في ناس قالت لي ليه ما كلمتهاش، لأني أنا في حالي مكنش عندي طريقة أقول لها خدي بالك من نفسك، وهي حاجة وأنا حاجة وأنا في حتة وهي في حتة وسني أكبر ومش بشتغل موسيقى وما اتقبلناش مرة ومش تركيبيتي أتطفل على حد إنما أروح أخبط على باب حد أو اتصل اتكسفت وما رضتش أحرج نفسي.
وأردفت: اللي بيعرفوني عارفين إني مش ست شريرة ولا بتنمر وماليش في الكلام ده، متابعة: بتهاجم وبرضى وبدافع عن نفسي بما يرضي الله، ومش هقول غير قوله تعالى إن الله يدافع عن الذين آمنوا، لأن ربنا عالم ويديني على قد نيتي.
واختتمت: عرفت إنها هتكمل تعليمها وبتحضر لشغل بقوة، وجايز يكون البعض تنمر عليها عشان مش متعلمة فحست إنها قليلة، مضيفة: استكمال تعليمها هيديها ثقة وطريقة كلامها هيتغير ونظرتها للأمور هتكون أهدى.
