نعيم عيسى يوجه رسالة لزوجته الراحلة: صورك قدامي وهفضل طول عمري حزين عليكي يا عفاف
بكى الفنان القدير نعيم عيسى، أثناء حديثه عن زوجته الراحلة السيدة عفاف، التي فارقته منذ 5 أشهر، بعد زواج دام 60 عاما.
وقال نعيم عيسى، في حواره مع الدكتور عمرو الليثي، في برنامجه واحد من الناس، المذاع عبر شاشة قناة الحياة: فقدت زوجتي من 5 شهور، فضلنا متزوجين حوالي 60 سنة، حسيت بحزن شديد بعد رحيلها، لأنها كانت بتحبني وأنا بحبها، وعمرها ما زعلتني في يوم من الأيام 60 سنة عايشين مع بعض آخر حلاوة، ولما ماتت حزنت عليها جدًا ولحد دلوقتي وهفضل طول عمري حزين عليكي يا عفاف يا بنت نعيمة.
ووجه الفنان نعيم عيسى، رسالة لزوجته الراحلة قائلًا: أنا كنت مطيع وهي كانت مطيعة ليا، ولكن كانت بتغير عليا أوي، وكنت أقول لها لأ ده شغلي والتمثيل مفيش غيره.. طول عمري هفضل حزين عليكي وصورك قدامي، الله يرحمك ويرحمنا جميعًا.
نعيم عيسى
كما استنكر الفنان نعيم عيسى، عدم تكريمه في المهرجانات الفنية، قائلًا: ببقى مضايق لكن هعمل إيه، بيكرموا ناس كتير وفنانين كتير، ولا حد فكر يكرمني وظلموني، ليه مبيبعتوليش، ليه مبيكلمونيش، ليه مبيبعتوش حد من النقابة، ليه مبيبعتوليش فنانيين، ليه النقيب مبيبعتليش مخرجين يشوفوني ويزوروني، والنقيب مبيجيش يزورني، أعمل إيه بس حياتي كده.
وأضاف نعيم عيسى أنه مرض ودخل المستشفى مرتين: الفنان أشرف زكي نقيب الممثلين هو الوحيد الذي وقف بجواري وسأل عليا وعمل لي عمليتين دعامة في القلب، ولم يسأل عني أي حد من الفنانين.
