8 علامات هتعرفك تكملي أو لا من أول مقابلة

طبعا صعب إننا نحكم على شخص من أول مرة نقابله فيها، ومع ذلك فيه علامات هتساعدك تقري شخصية الراجل في أول مقابلة تعارف بينكم 
خلينا نبدأ من الأول وبالترتيب 

لو اتأخر عليكي أكتر من عشر دقايق من غير عذر يستاهل وطبعا الأحلى إنه يوصل قبلك وبشكل عام أخّري نفسك ديما عن الميعاد بربع ساعة عشان متبقيش الطرف اللي مستني، وأيون في تحيز جامد للبنات والمفروض إن الراجل في الأول يكون بيبذل مجهود بشكل أكبر.

لو جه المقابلة بشكل مبهدل ومش مهتم بهندمة لبسه في ده حاجة من الاتنين يا طبع وده بقى وأنتي واستعدادك لتقبل الموضوع ده، أما المؤشر التاني يمكن مش حاسس أن الموضوع مش مستاهل أوي! الراجل بطبعه بيحب يبهر البنت في الأول فلو نقطة زي دي مركزش فيها يبقا مش هيبذل المجهود اللي يرضيكي.
لغة الجسد للراجل هتساعدك تعرفي إذا كان الراجل مهتم بيكي أو لا، يعني مثلا لو الأيادي المفتوحة معناه انه مستعد يتعرف عليكي... الجلوس واتجاه القدم في اتجاهك.. تعمده النظر لعينيكي بشكل كافي.. تعليقه الإيجابي على الأوت فيت بتاعك.. تسريحة شعرك.. حاجة في الميك اب بتاعك.. نظره تركيزه معاكي بالشكل الأكبر مش بيتشتت بالناس أو شاشة حواليكم مثلا.. عادي إنه مثلا أكيد هيبص على حاجة من وقت للتاني بس مش أغلب الوقت. 

تعرفي الراجل المهتم بيكي لما يهتم بتفاصيلك وراحتك وأنتو قاعدين، يعني مثلا يسألك المكان عاجبك ولا ياخدك مكان تاني.. درجة التكييف مناسبة ولا تغيروا الترابيزة.. لو بيدخن يسألك الأول لو هتتضايقي من الريحة.. يشوفك أنتي الأول هتطلبي إيه وكدة يعني.. تفاصيل صغيرة بس بتفرق.. ممكن حد كمان يكون مهتم بس متوتر شوية وده هيبان عليه فأنتي وتقديرك للموقف.. خليكي لطيفة ومتفهمة.

وانتو بتتكلموا هيكون مهتم أكتر يسمعك ويعرف عنك أكتر ما بيتفاخر بإنجازاته ولو لقيتيه بيبالغ في حكاياته عن نفسه وأد إيه هو محصلش... أعتقد أنتي عارفه ده معناه إيه. 

التليفون مهم جدا جدا للراجل وبيقول حاجات كتير عنه.. لو شايل تليفونه في إيده أو جيبه معظم الوقت.. بيجيله تليفونات طويله وانتوا قاعدين.. بيقوم من أدامك عشان يرد على الموبايل.. قافله أو حاطه على الترابيزه بالمقلوب «الشاشة في اتجاه الترابيزة» للأسف كل دي علامات مش مطمئنة خالص، وبالمثل بردو لو مِدِّي تركيز للتليفون أكتر منك يبقى He is not that much into you

نيجي بقى للنقطة الأكثر إثارة للجدل " لما بنت حلوة تعدي" عزيزتي المرأة مش محتاجة أكدلك إن كل الرجاله بتبص أو يعني عشان منظلمش الرجالة الإنسان بطبعه بيقدر الجمال بس هل يعني عينه على اللي رايحة واللي جاية زي ما الست شيرين قالت ولا نظرة عابرة وخلاص، من الذكاء أنه حتى لو بص مايخلكيش تاخدي بالك، أما بقا لو مش فارق معاه تاخدي بالك أو لا فده تقوليله هروح الحمام وتاخدي نفسك وعلى بيتك طوالي يعني خديها من قصيرها.. أحسنلك.

وأخيرا لو خلاكي تدفعي في أول ديت بينكم أو لو فرض عليكي تدفعي أصلا أي وقت..  مش محتاجة أقولك.. اهربي فورا. 

خليكي ديما واثقة إنك تستاهلي تتعاملي زي الأميرات ولو حاجة مش مناسبة ليكي يبقا الموضوع لا يستحق العناء 

دمتِ جميلة.