دينا الرفاعي: مفيش فرق بين راجل وست في كرة القدم.. ونسعى لإذاعة المباريات النسائية
كشفت دينا الرفاعي عضو مجلس إدارة اتحاد الكرة المصري، خطوات خاصة لتطوير الكرة النسائية في مصر.
تصريحات دينا الرفاعي
وقالت دينا الرفاعي في تصريحات تلفزيونية: تصنيفنا على مستوى العالم كان 96 وفي 5 يناير منذ دخول مجلس إدارتنا، كنا نسعى لتطوير المنتخبات وتصنيفنا اتحسن ووصلنا لمركز 94، من خلال بطولة في الأردن وقدمنا مستوى فني قوي.
وأضافت: العالم كله بيتقدم في كرة القدم النسائية وبقى زيها زي الرجال بالظبط وخدنا خطوات إننا نكمل ونسعى لتطوير الكرة النسائية في مصر.
وواصلت: لازم الشعب ثقافته تتغير ويكون مهتم أكثر بكرة القدم النسائية، والماتشات مش بتتذاع دلوقتي، وعلشان كدة بنسعى إن ماتشات الكرة النسائية تتذاع على الهوا.
وأكمل حديثها قائلة: مستوى منتخب مصر النسائي بقى أحسن وأفضل ومحتاجين إننا نبقى أفضل خلال الفترة المقبلة.
أقسم بالله بنات إنجلترا وألمانيا يقدروا يكسبوا فرق في الدوري المصري
ومن جانبه، علق أحمد حسام ميدو على الاهتمام الخاص بنهائي أمم أوروبا للسيدات بين إنجلترا وألمانيا.
وقال ميدو في تصريحات تلفزيونية: تخيلوا إن الحضور في ماتش نهائي أمم أوروبا للسيدات بين إنجلترا وألمانيا يبقى 87 ألف رايحين يتفرجوا على البنات بيلعبوا.
واستطرد: إنجلترا بقالها سنين بتحضر الشعب الإنجليزي إنه يحب الكرة النسائية، إيمانا منهم بإن البنات من حقها إن هي تلعب كورة مفيش عُقد ولا عنصرية.\
وواصل: أقسم بالله بنات إنجلترا وألمانيا يكسبوا فرق عندنا في الدوري المصري، عندهم سرعة وقوة ومهارة واستلام وتحضير ولياقة بدنية وكل حاجة.
واختتم حديثه قائلا: الكلام ده مجاش من يوم وليلة، الكلام ده جه بتشجيع البنات في الأول إنهم يلعبوا كورة وعملوا أكاديميات وفرق، ومفيش نادي في إنجلترا يجرؤ إنه ميكونش عنده فرقة بنات، ليه الأهلي والزمالك معندهمش فرقة بنات ونلعب دوري نسائي كبير والفريق المصري الوحيد اللي مهتم بالكرة النسائية وادي دجلة.
