طز في الآخرين.. أبو الليف يهاجم مجلس إدارة نقابة المهن الموسيقية
هاجم الفنان نادر أبو الليف، أعضاء نقابة المهن الموسيقية، وقال إنهم تخلوا عنه في الأزمة الصحية التي مر بها خلال الفترة الماضية، بعد ما طالبهم بدفع تكاليف المستشفى التي تلقى العلاج بها.
وكشف نادر أبو الليف، تفاصيل وحالته الصحية، في تصريحات تلفزيونية: أنا تعبت ودخلت المستشفى واتحجزت في العناية المركزة 18 يوم، وكان المفروض أدفع تكاليف قدرها 119 ألف جنيه، ولكن نجحت في تخفيض المبلغ مع المستشفى لـ 88 ألف جنيه، وحسبما تقول الفحوصات التي خضعت لها فالرئة الشمال بايظة، والرئة اليمين كفاءتها 15%، وعضلة القلب كفاءتها 25%، وفي رشح مياه، وعندي جلطتين في رجلي الشمال وجلطتين في رجلي اليمين، الحمد لله إن الواحد واقف على رجله وبيعافر وبيتعب وبيشقى وبياكلها بالحلال وعايز ياكلها بالحلال.
وتابع أبو الليف مهاجمًا أعضاء نقابة المهن الموسيقية: ربنا قدرني واتصرفت في الـ 88 ألف جنيه، من أصحابي ودفعتهم للمستشفى وخرجت، وكلمت أحمد رمضان سكرتير نقابة المهن الموسيقية، وقال لي هات الفاتورة وهات تقرير بالحالة، سلمتهم ليه وبقالي أكتر من شهر ونص دلوقتي، من قبل ما هاني شاكر يستقيل، إلى الآن كل ما أكلم حمادة أبو اليزيد وكيل أول نقابة الموسيقيين، يرد عليا يقولي أصل السقف بتاعنا 15 ألف جنيه.
وأضاف أبو الليف، أن أصدقائه في النقابة لم يهتموا بحالته الصحية والضائقة المادية التي يعاني منها، مؤكدًا أنهم تخلوا عنه، قائلًا: اللي في النقابة أخواتي وعشرة ومتربيين مع بعض، دراسة في الأكاديمية في المعهد في مصر، ولكن للأسف معملوش بالعشرة ولا بالصداقة ولا بالأخوة ولا بالعيش والملح.
وتابع: هما بمزاجهم بصراحة بمنتهى الصدق، هما نفسي ثم نفسي، ثم طز في الآخرين، أنا عايز أسأل سؤال، إحنا انتخبنا أعضاء المجلس دول عشان خدمتنا مظبوط؟ النهاردة هما مبيعملوش لخدمتنا هما بيعملوا لنفسهم، بيحللوا كل حاجة لنفسهم، وبياخدوا أماكن يشغلوها لنفسهم، وبيشغلوا الولاد بتوع المهرجانات وبيقعدونا إحنا.
