كل ابتلاء رحمة.. محمد يسري يكشف تفاصيل تعرضه لـ جلطة في القلب
طمأن الفنان محمد يسري، جمهوره على حالته الصحية، وكشف تفاصيل تعرضه لـ جلطة في القلب الفترة القليلة الماضية، وخضع لعملية قسطرة وتركيب دعامة في القلب.
وقال محمد يسري، في فيديو نشره عبر حسابه الشخصي بموقع تبادل الصور والفيديوهات انستجرام: أنا مبسوط إني بعمل الفيديو ده بالذات بعد التجربة اللي عديت بيها، والحمد لله إني قادر أطمن الناس، أنا تعرضت من أسبوع فجر يوم الأحد لوعكة صحية، حسيت بوجع شديد جدًا في صدري، وضغطي وطي جدًا وجسمي كان متلج، مكنتش أعرف ده إيه وكنت متخيل إنه حاجة وهتعدي، خاصة إن مفيش سبب إن ده يحصل.
وتابع محمد يسري: قعدت شوية في البيت لأني للأسف مش شخص ممكن يروح المستشفى طواعية، ودي طبعًا كارثة، وبعد شوية ربنا ألهمني إني لازم أتحرك، وروحت المستشفى، الناس استقبلتني على طول، وكانوا متخيلين إن الدنيا تمام لأني دخلتلهم على رجلي.
وأوضح محمد يسري، أنه لم يكن يدرك مدى خطورة حالته الصحية، حيث إنه اكتشف إصابته بجلطة في القلب واضطر لعمل قسطرة ودعامة في القلب: لكن بعد ما بدأنا نعمل فحوصات طلع عندي جلطة في الشريان الأمامي في القلب، والجلطة دي عملت شبه انسداد كامل في الشريان، فالدم مش داخل بسهولة، فاضطريت في ساعتها إني أعمل قسطرة وأركب دعامة في القلب، واتحجزت يومين في العناية المركزة، وبعدها يومين في غرفة عادية، وخرجت الحمد لله، قدر ولطف.
ووجه محمد يسري، رسالة لجمهوره بضرورة الاهتمام بالصحة قائلًا: مفيش أي ضرر دائم أو أي حاجة أتأثرت بشكل دائم، ولكنها تجربة صعبة أوي، ارجوكم متتهاونوش في الصحة، لأن الحقيقة إن الدكاترة كلهم قالوا إن مكنش ينفع أتأخر أكتر من كده.
كما قال أنه يخضع الآن لفترة نقاهة وهناك العديد من الأعمال لتي سيكشف عنها الفترة المقبلة: أنا مكنتش عايز أقول إني في المستشفى لأني مكنتش عايز أقلق حد، أنا الحمد لله في بيتي وفي فترة نقاهة لمدة أسبوع، وهرجع تاني لشغلي وفي حاجات هعلن عنها قريب يارب تكمل على خير.
واستطرد: حقيقي ربنا قدر ولطف، دائمًا في كل ابتلاء رحمة، لما طلعت من العناية المركزة وبدأت أجمع، كمية الناس اللي سألت وحابة تطمن عليا الحمد لله، وألف شكر وربنا يخليكم ليا.
واختتم حديثه بتوجيه الشكر لنقابة المهن التمثيلية، قائلة: كل الزملاء والأصدقاء، ونقابة المهن التمثيلية، والنقيب دكتور أشرف زكي، ألف شكر، مسابنيش ثانية، والفنان عزوز عادل حبيبي، ربنا يخليكم ليا وألف شكر.
