ابنة حسن أبو السعود: أرشح أحمد رزق لتجسيد شخصية والدي لأنه يشبهه
كشفت رنا ابنة الموسيقار الراحل حسن أبو السعود، الفنان الأنسب لتجسيد شخصية والدها في عمل فني سواء في السينما أو الدراما.
وقالت رنا حسن أبو السعود خلال لقائها مع القاهرة 24: أرى أن أحمد رزق الأنسب لتجسيد شخصية والدي لأنه يشبهه، مضيفة: مقلوظ شوية زيه.
وعلقت رنا، على حديث شيرين عبد الوهاب عن والدها الموسيقار الراحل وما وصفه البعض بالسخرية والتنمر، ما عرضها للهجوم بسببه والانتقادات.
وقالت رنا: لما عرفت تأثرت جدًا ودمعت، لأنها اتقالت بطريقة غير لطيفة، ولكن أنا بلتمس لها العذر جدًا، هي لم تقصد أكيد وهي مضغوطة كفاية وعندها مشاكل كتير، وإحنا متعودين إن شيرين بتطلع تقول كلام مش متزن إلى حد ما، ولكن أنا مش هعرف أعمل أي حاجة غير إني أسامحها.
وأضافت: توقعت اعتذارها لأنها لم تقصد، ولأن علاقتها بوالدي كانت قوية جدًا، شيرين طبعًا صوت بديع ومش هيتكرر بالنسبة لي، والبيت طبعًا ده كان بيتها، وبابا كانت بالنسبة له بنته وكان بيتعامل معاها بحب وسند، وهو اللي كان السبب إنه يطلعها ويوديها لـ نصر محروس ويقوله هتمضي معاها لأنها فنانة رائعة وصوتها رائع.
واستكملت ابنة حسن أبو السعود: أتذكر أول مرة جاءت لمنزلنا حتى يستمع أبي لصوتها، كلنا دمعنا من بحة صوتها الحلوة ونقاء صوتها، هو بالنسبة لها كان سببا في شهرتها، مش ممكن هيكون رد الجميل أنها تكون بتهينه، مستحيل ومعتقدش إن تفكيرها كده، علشان كده من قبل ما هي تنزل الاعتذار لم أشك لحظة إنها أرادات إهانته.
