دينا الشربيني: حبيت مرتين في حياتي وللأسف بكرر غلطاتي.. وبكره الكذب والخيانة
تحدثت الفنانة دينا الشربيني عن مفهوم الحب في حياتها، وتأثير العلاقات التي خاضتها على حياتها حتى الآن.
وقالت دينا خلال استضافتها ببرنامج AB TALKS الذي يقدمه الإعلامي أنس بوخش: أنا مندفعة وبمشي ورا إحساسي وأكيد عايزة أغير حاجات فيا وكلنا عايزين نبقى أحسن بس حاسة إن لو فيه حاجات فيا اتغيرت هبقى أوحش مما أنا عليه دلوقتي.
وتابعت دينا الشربيني: أؤمن بالحب من أول نظرة وحبيبة أوي، وأنا عارفه إني من جوا شخص ضعيف لما بقعد مع نفسي قلبي خفيف أوي وبتأثر بسرعة وبحب بسرعة.. وعشان بكره الضعف فباجي على نفسي، والحمد لله أنا أحسن من ناس كتير وكل حاجة بحبها حوليا فلازم استحق ده عشان ميروحش مني.
وأضافت دينا: حبيت مرتين في حياتي وللأسف بكرر غلطاتي في علاقاتي.. ومعنى الحب بالنسبة لي هو الأمان والثقة والحنان وبكره الكذب والخيانة في العلاقة، ومفهوم الحب ككل حلو ولكن لما بيبقى الإنسان في علاقة ويحب بجد بيتوجع فده مش بحبه في الحب.
أما عن طفولتها، فاستكملت دينا حديثها، قائلةً: طفولتي كانت حلوة أوي لحد الجامعة، وأنا كنت طفلة شقية وعندية جدًا وزنانة وبقول يارب عيالي ميطعلوش زنانين وأهلي كانوا كويسين أوي واصحابي بالنسبة لي حاجة مهمة أوي، وبابا كان زمان بيسافر كتير.
