سعد الصغير عن واقعة طالبة المنصورة: كان شارب حاجة.. ولو بإيدي مش هيكفيني موته
علق الفنان سعد الصغير على واقعة طالبة المنصورة، نيرة أشرف التي ذبحها زميلها باستخدام سكين، وسط الشارع أمام أبواب جامعة المنصورة، وأحدثت ضجة كبيرة.
وقال سعد الصغير في بث مباشر عبر صفحته الرسمية بموقع فيسبوك: عمر ما حد بيحب حد يموته، الواد ده كان شارب حاجة، يا رب صبر أمها وأبوها، لو أنا هموته مش هيكفيني فيه يتعدم، هو فيه حد بيحب حد يموته، في حد كده.
وأضاف الصغير: اوعى حد يقنعني إن الراجل ده كان في وعيه.. لو هي قالت له مش عاوزاك يسألها ليه ولو فيه عيوب يصلحها، أنا والله العظيم بروح أفراح بيفرقوا أكياس أي حاجة تتخيلوها في الدنيا وباخدها أرميها.. تموت عروسة كده لو بنتي وهيتشنق مليون مرة ناري مش هتبرد.
وتابع: أكيد كان شارب لو مش شارب هياخد ويدي معاها.. ولكل أم راقبي ابنك كتفيه ووديه للمصحة.. أنا في الأفلام بمثل الحاجات دي وليا أصحابي بيشربوا الحاجات دي وبزعل عليهم ووشهم بيبقى معضم.. ما حدش بيموت حد غير لما يكون واخد حاجة.
وأثار حادث مقتل طالبة المنصورة نيرة أشرف، الطالبة بكلية الآداب جامعة المنصورة، ضجة كبيرة بعد ذبحها على يد زميلها بذات الكلية، أمام أعين المارة وقد تبين من التحريات الأولية وأقوال الشهود والمقربين من الضحية أن المتهم ارتكب جريمته بعد رفضها الزواج منه والارتباط به، إذ سدد المتهم، عدة طعنات نافذة لزميلته، وذبحها أمام حرم الجامعة، وألقت الأجهزة الأمنية القبض عليه، واقتادته إلى قسم شرطة أول المنصورة بعد إجراء إسعافات أولية له، وخضع للتحقيق حيث تم تحرير محضر بالواقعة وإحالته للنيابة العامة التي تباشر التحقيقات.
