سيدة بعد طلاقها غيابيًا: جوزي ضحى بيا علشان رقاصة فرنسية.. أنا استسلمت ومش قد الحياة
نشرت إحدى السيدات تدعى آية أحمد، منشورًا على صفحتها الشخصية بموقع التواصل الاجتماعي فيس بوك، تشير فيه إلى نيتها للانتحار عقب تعرضها لـ الطلاق الغيابي من قبل زوجها، الذي ارتبط بإحدى الراقصات الفرنسيات، وإجبار الأخيرة له على تطليق زوجته، ليضمن استمراره معها والإقامة بدولة فرنسا.
سيدة بعد طلاقها غيابيًا: جوزي ضحى بيا علشان رقاصة فرنسية
قصت السيدة آية المقيمة بمنطقة البدرشين بمحافظة الجيزة، تجربة زواجها التي استمرت 7 سنوات قائلة: أنا وقع عليا ظلم كبير أوي من أكتر شخص حبيته ووقفت قصاد أهلي والدنيا كلها علشانه الشخص اللي اتنازلت عن حقوقي ولا طلبت منه قايمة ولا مؤخر ولا طلبت منه حاجة فوق طاقته ورضيت معاه بكل ظروفه ورضيت بأقل من القليل منه، رغم رفض أهلي ليه لكن قولت لا هو ده اللي هحارب الدنيا علشانه، الشخص اللي بشهادته هو شخصيا كنت خير زوجة ليه، أديته حب مافيش إنسان في الدنيا كان ممكن يديهوله، عمري ما كسرت ليه كلمة وما قصرتش في حقه كزوج ثانية، صونته وحفظته في غيابه قبل وجوده.
وأضافت: جوزي طلقني غيابي بسبب أنانيته وظلمه، بسبب إن مراته الفرنسية أمرته إنه يطلقني علشان تسيبه يعيش معاها وتوفرله الحياة اللي عاوزها في فرنسا، قرر يضحي بيا ويطلقني غيابي من غير حتى ما ياخد رأيي، قرر لوحده ونفذ علشان استضعفني وعلشان ينفذ رغبة مراته الفرنسية اللي أمرته بكدا وهو قالها سمعا وطاعة، طلق مراته اللي حبته وصانته واللي لا أتت بفاحشة ولا قصرت في حقه ولا كسرتله كلمة علشان عيشة حلوة في فرنسا تحت ضل واحدة ست تانية بتتحكم فيه.
وتابعت: أنا اتجوزت مرة كان عندي 16 سنة جوازة كنت بعاني فيها وبتصبح بعلقة وبتمسى بعلقة وقعدت 7 سنين اتعافى من الجوازة دي، سبع سنين رافضة الجواز تاني بسبب خوفي ورعبي من اني اتظلم تاني هقعد كمان كام سبع سنين اتعافى من جوازتي بمحمد الشخص اللي حبيته وآمنتله واتمنيت أكمل عمري معاه، هو العمر فيه كام سبع سنين كمان هقدر اعيش ازاي في مجتمع مارحمنيش وانا حتة عيلة ماتفهمش حاجة واطلقت مرة هيرحمني ازاي وانا ماكملتش سنة منها شهر معاه و8 شهور مسافر بعيد عني واتحسبت عليا جوازة تاني يعني بقيت مطلقة مرتين! لا حد هيرحمني ولا انا هستحمل، أنا استسلمت حقيقي أنا مش قد الحياة دي ولا قد بشاعتها وظلمها ليا أكتر من كدا ماعادش فيا نفس أعافر تاني.
فيما وجهت رسالة لشقيقها ويدعى أحمد قائلة: عاوزة أقول لأحمد اخويا انت أصدق حد حبني في الدنيا دي كلها انت وأمي واخواتي بس للأسف أنا ماقدرتش ده أتمنى بس تسامحوني في يوم بس علشان عارفة إني تعبتكم كتير كان لازم يكون في نهاية للرحلة المتعبة دي.
وعن شقيقتها وتدعى إسراء قالت آية، أختي قالتلي جملة احنا بقالنا أكتر من 7 سنين في مشاكلك انتي وفي تعبك انتي وفي ضغطك انتي وبجد تعبنا، وعلشان كدا بتأسفلكم انكم اضطريتم تعيشوا كل ده بسببي! خلاص كدا ده آخر الطريق وآخر المشوار مافيش تعب تاني.
واختتمت السيدة آية منشورها قائلة: ادعولي وادعوا لأمي واخواتي ولو هيكون ليا طلب أخير فهو لو حد راح يعمل عمرة ياريت يعمللي عمرة معاه لأنها كانت أكتر حاجة نفسي فيها.
