غادة إبراهيم: عمري ما قلت على نفسي نجمة.. والكاريزما من ربنا | فيديو
قالت الفنانة غادة إبراهيم، إنها لم تطلق على نفسها لقب نجمة طوال مسيرتها الفنية، كما أنها تلاحظ أن لها جماهيرية كبيرة، على الرغم من قلة أعمالها.
وأضافت غادة إبراهيم، في حوارها مع القاهرة 24: عندي حاجة غريبة جدًا بلاحظها في كل حتة، أنا عندي متابعين بطريقة غير عادية، وعمري ما قولت على نفسي نجمة، وأنا مش نجمة سوبر ستار، أنا مواطنة عادية بسيطة بحب التمثيل، وبيجي دور حلو بعمله، لكن عمري ما مثلت دور مش عايزه أعمله، عشان أكون متواجدة على الشاشة وخلاص.
غادة إبراهيم: عندي قبول رهيب عند الناس
وتابعت غادة إبراهيم: عندي قبول رهيب عند الناس، والناس مش هبلة، الناس بتقرأ العيون وبتعرف المصداقية، إذا كان الإنسان ده حقيقي ولا مصطنع، ما أنا أهو من غير فلتر قدامكم، بالرغم من إني مش نجمة سوبر ستار، الناس بتحس بمصداقية عندي، وعمري ما طلعت في برنامج أو أي حاجة عشان بس أبقى موجودة، الكاريزما دي من عند ربنا، والقبول من عند ربنا، ودي حاجة ملهاش دعوة بالفلوس ولا بالتاريخ ولا بالشكل، أنا مش حلوة أنا عادية.
غادة إبراهيم: ملامحي حادة.. والمخرج الشاطر اللي يغير جلدي
وأشارت غادة إبراهيم، إلى أن أغلب الأدوار التي تقدمها تكون أدوار شر بسبب ملامحها الحادة، معقبة: أنا ملامحي حادة، بس المخرج الشاطر اللي يغير جلد غادة إبراهيم، يشيلي المكياج ويلملي شعري ويخليني مكسورة وغلبانة وطيبة، لكن المخرجين بيستسهلوا ويطلعوني في دور الشريرة، بسبب ملامحي الحادة، دي مش شطارة، الشطارة اللي عملها المخرج الراحل الأستاذ محمد راضي في فيلم ضفرتين في بحر البقر، كسر كل حاجة بعد ما كانت غادة معروفة بالإغراء.
