تعاطف ولوم.. كيف تفاعل رواد تويتر وفيسبوك مع خبر القبض على قمر؟
تمكنت الأجهزة الأمنية، اليوم الاثنين، من القبض على بائعة منتجات التجميل، المعروفة إعلاميًا بـ قمر الوكالة، حيث وجهت إليها تهمة بيع مستحضرات تجميل وعناية بالبشرة والشعر مغشوشة، وغير صالحة للاستخدام في منطقة الوكالة، دون حيازتها على تصريح لذلك.
كيف تفاعل رواد السوشيال ميديا مع خبر القبض على قمر؟
وشهدت مواقع التواصل الاجتماعي حالة من التناقض، حيث تعاطف البعض معها، في حين اتهمها البعض أنها نصبت على الفتيات وأضرت ببشرتهم، من خلال منتجاتها المغشوشة.
انتقادات تواجه قمر الوكالة
وقال مستخدم: مش مصدق إن فيه ناس متعاطفة مع قمر البنت اللي بتضحك على الناس وبتقنعهم إن منتجاتها اللي برخص التراب هي هي نفس المنتجات الأصلية لكن متهربة، واستحلت الحكاية وكل يوم طالعة لايف كأن إلهام شاهين فتحت في الوكالة، أمر طبيعي ومنطقي القبض عليها علشان يعرفوا المنتجات دي بيتم تصنيعها إزاي، قال أوريجنال قال.
وتفاعلت أخرى مع الخبر، فكتبت: طبعا ظهور واحدة زي قمر الوكالة صغيرة حوالي 19 سنة اللي بتبيع كل حاجة رخيصة وماركات كبيرة، كارثة بمعنى الكلمة، عشان لو حاجاتها حقيقية ومش مضروبة يبقى مفيش رقابة للأسف على الأسعار ودي كارثة، ولو حاجتها مضروبة فكارثة أكبر لأن مفيش حماية للمستهلك.
وتساءلت: فين الرقابة على السلع من المهزلة دي؟، أين الرقابة، أين حماية المستهلك، أين حق المصريين في الحفاظ على صحتهم وأموالهم، من حق كل مواطن يعرف حقيقة هذه المنتجات، وأعرف إزاي مفيش صيدلية أو محل بياخد من قمر ويبيع، وأعرف إزاي أن كل الأونلاين مش مضروب، هل قمر صورة فقط لمافيا أدوات التجميل وكبش فداء؟
تعاطف مع قمر الوكالة
وكتبت أخرى: ربنا معاكى على إللى اتحطيتى فيه، ومحدش يقولى بتبيع مغشوش، اللى رايحين يشتروا عارفين أنها بتبيع بطاطس فى أزايز حلوة وشيك، حابين يضحكوا على نفسهم بمزاجهم، البطاس بيفيد بشرتهم، محدش منهم اشتكى ولا حد جلدة انسلخ، واللى بيشتروا الغالي وقادرين علية عارفين إن اللى بتبيعه مغشوش ومتعبي تحت السلم، زى اللى بياكل رغيف الحواوشي أبو 3 جنيه وعارف أنه بصل وفلفل وبيصبر جوعه، ياريت نسيب الغلابة فى حالهم،الوكالة كلها بضايع متهربة ومغشوشة وفيها 100 قمر.
وعلقت فتاة على خبر القبض على قمر، فقالت: قمر بنت لا كانت مشهورة ولا تعرف حاجه عن الشهرة ويمكن كمان مكنتش بتسعى للشهرة، قمر بنت عادية خالص بتبيع بفرشة بضاعة على الرصيف زي ناس كتيرة بتسترزق، الله أعلم الحاجه اللي بتبيعها دي متعبية أو منتهية الصلاحية أو مصدرها إيه.
وأضافت: فيه غيرها كتير بيشتغلوا في المكياج والإكسسورات وبواقي المصانع حتى بواقي المطاعم ومصانع الحلويات، المهم إن الناس دي ليهم زباينهم من زمان زي اللي بيبيعوا كسر الجاتوه ورغم تحذيرات ناس كتيرة من شراء كسر الجاتوه والحلويات لكن برضو الناس بتشتري عشان إيه، عشان ناس تانية تسترزق.
رواد تويتر يتفاعلون مع الخبر
وكتبت فتاة عبر تويتر: الحرية ل قمر حسناء الوكالة، وقالت أخرى: قمر بتاعة الميك آب بتاعة الوكالة صعبانة عليا جدا، آسفة.
قصة الفتاة قمر الوكالة
وتصدرت الفتاة قمر تريند مواقع التواصل الاجتماعي خلال الفترة الماضية، بعد تداول فيديو لها، وهي تبيع منتجات تجميل بأسعار رخيصة في منطقة الوكالة ببولاق أبو العلا وتزعم أنها ماركات مشهورة.
