زوج مارينا صلاح ضحية الإهمال الطبي: مش هسيب حقها لو آخر يوم في عمري
قال رامز دوس، زوج مارينا صلاح، ضحية الإهمال الطبي، خلال إجراء أشعة تصوير لقاع العين بالصبغة دون إجراء تحاليل الحساسية والكلي الخاصة بها، إن زوجته كانت بصحة جيدة عند دخولها إلى المستشفى، لكنها خرجت جثة هامدة.
مارينا كانت ماشية على رجلها
وأضاف دوس في برنامج على مسئوليتي، المُذاع على قناة صدى البلد، والذي يقدمه الإعلامي أحمد موسى: كنا رايحين نكشف على عينها عند دكتور في مستشفى الوطني للعيون.
وتابع: مارينا كانت ماشية على رجلها، وهي في مستشفى وطالعة بتجري منهم من جوه، وبتقولي الحقني أنا بموت، معقبا: أنا مش مستوعب خالص، اللي حصل أنا لسه دافناها حالًا.
وواصل: ابنها سنة ونص بس، أنا بناشد الرئيس عبد الفتاح السيسي، أنا مش هسيب حقها، لو آخر يوم في عمري، لو هنام عند قصر الاتحادية لحد ما أقابل الريس هعمل كده، لكن مش هسيب حقها، مشددًا: أنا واثق في الريس، وعمره ما هيعدي حاجة زي دي.
وفي وقت سابق، قال مصدر مقرب من الضحية مارينا صلاح، تفاصيل الواقعة لـ القاهرة 24: كانت عينها ملتهبة ولونها أحمر، وبقالها 3 شهور بتكشف على عينها عشان تعرف سبب الاحمرار الشديد.
وأضاف المصدر: عملت امبارح في مستشفى للعيون أشعة بالصبغة، من غير ما يتعمل ليها تحليل الحساسية، لكن بمجرد ما خرجت من أوضة الأشعة، مسكت جوزها جامد وقالتله الحقني أنا بموت.
وأكد المصدر أنها سقطت بين يدي زوجها في حالة إغماء، متابعا: مكنش في عناية مركزة في المستشفى، وداها بسرعة على مستشفى جنبها واتحجزت، وبدأت أجهزة جسمها تقف، كل ده في أقل من 24 ساعة.
