يصف فيها بائع المشروبات المتجول في شهر رمضان "الشـــــــــــربتــــــلي".. شعر مسعود شومان
الكثير من الأدباء وخصوصا الشعراء يستلهمون شهر رمضان في أشعارهم مجسدين طقوسه وأجواءه، وهذه قصيدة للشاعر مسعود شومان بعنوان الشربتلي يصف فيها بائع المشروبات المتجول في شهر رمضان.
قصيد الشربتلي
قلنا يعيش الشَرْبتلى
والعرقسوس مع قمر الدين
على الصاجات بيخبّطلى
بينادى ع الناس العاشقين
ويصب فى الكوز المطلى
والدوم ينادى على الخروب
والسوبيا جايه بتتعايق
والعرقسوس عِرف المطلوب
وقال أنا الولد العاشق
رمضان نادانى لبست التوب
طعم الجميل م الشربتلى
والحلوه قالت إيه أجمل
من الفراوله بخد جميل
صابحه وشاربه حنان النيل
لما استوت طل بعتلى
والتمر بيغنى المواويل
بيصب من قلبه الرايق
قلنا يعيش الشَرْبتلى
والعرقسوس مع قمر الدين
على الصاجات بيخبّطلى
بينادى ع الناس العاشقين
ويصب فى الكوز المطلى
والدوم ينادى على الخروب
والسوبيا جايه بتتعايق
والعرقسوس عِرف المطلوب
وقال أنا الولد العاشق
رمضان نادانى لبست التوب
طعم الجميل م الشربتلى
يا كوبيات الهنا والنور
شربت منك شربات لوز
والتمر هندى عليه الدور
فرحان ونازل م البزبوز
على الصينيه المانجه تدور
ومعاها طعم العشق يجوز
قلنا يعيش الشَرْبتلى
والعرقسوس مع قمر الدين
على الصاجات بيخبّطلى
بينادى ع الناس العاشقين
ويصب فى الكوز المطلى
والدوم ينادى على الخروب
والسوبيا جايه بتتعايق
والعرقسوس عِرف المطلوب
وقال أنا الولد العاشق
رمضان نادانى لبست التوب
طعم الجميل م الشربتلى
يا لمة الأحباب عندى
البرتقان قال يا سفندى
أنا اللى فرحان من يومى
والمشمشيه بتعدى
وأنا نويت لله صُومى
وقلبى م الزلات مطلى
طعم الجميل م الشربتلي
