بطل أغنية مستشفى 57357: حسيت بتقدير كبير في عيون الناس.. وبحلم بلقاء الرئيس السيسي
أعرب محمود سامح، طالب بالصف السادس الابتدائي، عن سعادته لظهوره كأحد المتعافين من مرض السرطان، وأبطال عمل أغنية ألفين سلامة، للنجمة نوال الزغبي لدعم أطفال مستشفى 57357.
محمود سامح: حلمي أقابل الرئيس السيسي
وقال الطالب محمود سامح، في حديثه للقاهرة 24، إنه تم اختياره للظهور بالأغنية، ليس لكونه فقط أحد المتعافين من مرض السرطان، ولكن لكونه بطلا في الفروسية، وحصده للعديد من الجوائز على الرغم من صغر سنه.
وتابع سامح: حسيت بفخر وتقدير كبير في عيون الناس، كأحد المنتصرين على المرض، موضحا: حلمي أقابل الرئيس السيسي، علشان أقدر أعرض تجربتي واحكي عن التنمر، اللي بيتعرض ليه الأطفال المصابين بالسرطان
وأضاف الطفل محمود سامح: أجريت 50 عملية جراحية وعملية بتر في القدم في سنوات معدودة، ولكن كان عندي حلم أكبر وإني أكون بطل فروسية وانتصر على المرض.
وفي وقت سابق، كتب محمود سامح، عبر صفحته على موقع التواصل الاجتماعي فيس بوك: من أول ما تعبت بالسرطان، ماما وبابا فهموني إن ربنا كده بيحبني، ولازم أتحمل كل حاجة، عشان ربنا ميزعلش منيّ، كنت صغير قوى عندي 5 سنين وقتها.
وأضاف سامح: الحمد لله أنا مكمل، وشايف إني بطل، وعملت 50 عملية، ومبقاش عندي غير رجل واحدة، بس أنا كملت، وركبت جهاز، وبقيت بطل في الفروسية، وحققت جزء من الحاجات اللي بحبها، وبحلم بيها، وفرحان قوي عشان معايا اصحابي، وبابا وماما وأهلي والدكاترة اللي بحبهم، وناس كتيرة بحبها، وكمان المدرسة بتاعتي.
