طارق الجنايني عن سوتس بالعربي: أول عمل عربي يتم توزيعه عالميا من شركة NBCU
حقق مسلسل سوتس بالعربي نجاحًا كبيرًا بعد عرض الحلقة الرابعة اليوم على قناة CBC، والعمل من بطولة آسر ياسين، أحمد داود، صبا مبارك، وعدد آخر من الفنانين.
ونشر المنتج طارق الجنايني على حسابه الرسمي بـ فيس بوك منشور كتب في: بوست طويل شوية مع انتهاء الحلقة الرابعة من سوتس بالعربي، الحمد لله في منتهى السعادة بردود الفعل المحبة للمسلسل.. والصراحة عندي كام نقطة كدة كنت عايز أوضحهم من أول ما أعلنت عن تصوير سوتس بالعربي، بس كنت خايف تتفهم غلط.
وأردف طارق الجنايني بـ: بس النهاردة بعد ما الحمد لله المسلسل أثبت نجاحه والناس بتشيد بيه في العالم العربي كله، أقدر بقى أوضح براحتي، أولًا كل صناع سوتس بالعربي من عشاق النسخة الأمريكي، اللي على فكرة تكلفة الحلقة الواحدة منها أكثر من تكلفة الـ 30 حلقة عندنا، وكلنا فاهمين من الأول إنك تعمل adaptation لمسلسل معروف ومحبوب زي سوتس مش هتكون خطوة سهلة خالص والـ die hard fans اللي إحنا أصلًا منهم مش هيتقبلوها بسهولة.
واستكمل حديثه: إن من شاهد النسخة الأمريكية من المسلسل ما بين مليون لمليوني شخص، ولكن العالم العربي عبارة عن 350 مليون شخص، أي أن هناك أكثر من 348 مليون عربي لم يشاهدوا العمل.
وأضاف الجنايني: علشان أنت شاري فورمات ودافع فلوسها ومعاك حقوقها، فهمّا كمان عندهم حقوق أنك ماتبوظش شغلهم وتفتي من دماغك، علشان كدة لازم يكون تغييرات السيناريو في أضيق الحدود وبموافقتهم، بما فيها الاسم اللي بيتعامل معاملة البراند وده اللي حصل مع الأمريكان نفسهم لما اشتروا حقوق the office مثلًا من إنجلترا وأمثلة تانية كتيرة في التليفزيون والسينما.
واصل الجنايني: والأشخاص الذين يتعاملون مع أبطال مسلسل سوتس الأمريكي على أنهم من الرسل وحرام تجسيدهم، فأحب أن أخبرهم أن أصحاب النسخة الأمريكية منبهرون بما نقدمه من تمثيل وصوت وصورة، ولديّ إيميل موثق بهذا الأمر.
واستكمل الجنايني: طبيعي إنك تتفرج على الحلقة الأولى، وتحس إن المسلسل ده مش ليك فتعبر عن رأيك، وده حقك تمامًا، بس غريبة شوية إن حضرتك لسة بتتفرج لغاية الحلقة الرابعة علشان تكتب بعد كل حلقة أن الأمريكي أحلى برضه، أنا حاسس أنك أتعودت علينا بس خايف تعترف.
وقال الجنايني: الأهم بقى من كل اللي فات ده والسبب الرئيسي لكتابة البوست ده، أن بعد مشاهدتهم لأول 10 حلقات تم الاتفاق مع NBCU أن النسخة العربية من سوتس دلوقتي داخله الكتالوج الرسمي بتاع NBCU وهتتبدي تتوزع للعالم كله من شهر سبتمبر أنت فاهم الفخر اللي احنا في أ ن أول مرة مسلسل عربي هيتم توزيعه من شركة زي NBCU، أنت فاهم ده قد إيه مهم ومفيد لمصر، الخطوة دي بقى بالنسبة ليا أنا شخصيا تكفيني لسنين قدام.
مسلسل سوتس بالعربي
العمل من بطولة آسر ياسين، أحمد داود، صبا مبارك، ريم مصطفى، تارا عماد، وعدد آخر من الفنانين، والعمل من تأليف ياسر عبد المجيد ومحمد حفظي وإخراج عصام عبد الحميد.
