أمير كرارة: ماعنديش مانع بناتي تمثل.. وأخويا لو مثّل معايا هيتأذي
تحدث الفنان أمير كرارة عن شقيقه الفنان أحمد كرارة، موضحًا أنه لم يرشحه من قبل للعمل معه في أعماله الفنية، حتى لا يتعرض شقيقه للأذى، ويقال أنه دخل التمثيل لأنه شقيق أمير كرارة وتُنسى موهبته.
وقال أمير كرارة، في الجزء الثاني من حواره مع الإعلامية أسما إبراهيم، في برنامج حبر سري: أخويا شغال كويس وماشي كويس، ومينفعش نشتغل سوا، ومش صح، وأتمنى أشوفه قدي 20 مرة ويبقى أحسن مني، وإحنا فيه بينا شغل تاني غير التمثيل وهو اللي مسئول عنها مش أنا، ولكن في التمثيل لا، وعمره ما زعل إننا مش بنشتغل مع بعض، وهو راجل فاهم ومقتنع إن ده صح.
وتابع: فيه ممثل كان في الاختيار السنة اللي فاتت وعجبني جدًا، ولما سألت عرفت إنه ابن خالد النبوي، واسمه خالد النبوي، وده اسم ونجم كبير وعبقري، ويعني هو مكنش قادر ياخد ابنه في فيلم أو مسلسل؟، لا كان قادر، ولكن هور اجل بيفكر صح، وبيخاف على مهنته واسمه وعلى ابنه وخلى ابنه يشق طريقه، وأكيد اتبسط إن ابنه اعتمد على نفسه وكل مصر كانت بتتكلم على ابن خالد النبوي في المسلسل.
وأضاف أمير كرارة: أحمد أكبر مني سنًا ولكن أنا أكثر خبرة منه في الشغلانة، وهو حتى مش متضايق في ده، ولكن هو عارف إن ده صح له، هو ولكن لو اشتغل معايا كان هيتقال ده أخوه اللي مشغله وهيتأذي، وهو طلع مشهد في مسلسل كلبش ولكن مرشحتوش في العمل.
أما عن رأيه في دخول بناته مجال التمثيل، أردف أمير كرارة: ماعنديش مشكلة مع دخول بناتي التمثيل وهساعدهم ولكن هسيبهم يشقوا طريقهم لوحدهم، ولازم يختاروا طريق لوحدهم ومش هيمثلوا عشان بنات أمير كرارة لا، لازم تكون بنتي موهوبة وتشتغل على إنها تنمي موهبتها سواء نيللي أو ليلى.
