كنت فاكر إني أقدر أمشي بالرخصة السعودية.. نص التحقيقات مع المتهم بدهس طالبة مصر الجديدة
كشفت التحقيقات في واقعة مصرع طالبة بـ كلية البنات تُدعى إسراء؛ أن وراء ارتكاب الواقعة شاب خليجي يُدعى محمد.ق 22 عاما، طالب بكلية الطب جامعة المنصورة، ورفقته 4 أشخاص آخرين بشارع العروبة أسفل كوبري الميرغني اتجاه العباسية.
دهس طالبة بكلية البنات
وحصل القاهرة 24 على نص التحقيقات في واقعة مصرع طالبة دهسا بمصر الجديدة وجاءت كالتالي:
س: ما قولك فيما هو منسوب اليك من أنك متهم بالتسبب خطأ في جرح المجني عليها أسراء أحمد بأن كان ذلك ناشئا عن إهمالك ورعونتك وعدم احترازك وعدم اتباعك للوائح والقوانين اصطدمت بسيارتك بالمجني عليها فأحدثت بها الإصابات الموصوفة بالتقرير الطبي المرفق وقد نكلت عقب ارتكابك الواقعة عن مساعدة المجني عليها أو طلب المساعدة وقمت بالفرار بالسيارة تاركا إياها بالطريق العام على النحو المبين بالتحقيقات ؟
ج: “الكلام ده محصلش وأنا اللي طلبتلها الأسعاف من رقم زميلي اللي كان معايا”.
س: ما الذي حدث إذا وما هي ظروف الواقعة ؟
ج: اللي حصل أن أنا كنت ماشي في شارع صلاح سالم وأنا معرفش بالظبط فين في صلاح سالم، لأن أنا مش حافظ المكان، وأنا ماشي فوجئت بواحدة قدام العربية حاولت أفاديها لكن مقدرتش، واصطدمت بها وبعدها وقفت على يسار الطريق بس موقفتش علطول عشان في عربيات مسرعة جاية من ورايا فهديت لغاية لما وقفت على الشمال ونزلت وطلبتلها الإسعاف ومتحركتش لغاية لما الإسعاف جت وشالتها، وكنت عايز أركب معاها عربية الإسعاف بس الشرطة قالتلي مينفعش عشان لازم أروح على القسم معاهم وبعدها اتحجزت في قسم الشرطة وكان في واحد صديقي بيتواصل مع أهلية المصابة وراحلهم المستشفى ومعرفتش أروحلهم لأني كنت محجوز في القسم ولما طلعت كان عندي امتحانات وده كل اللي حصل".
س: متي وأين حدث ذلك ؟
ج: الكلام ده حصل يوم 26 فبراير 2022 حوالي الساعة 11:00 الصبح أو بعد كدة بشوية في شارع صلاح سالم مصر الجديدة.
التحقيقات في مصرع طالبة بمصر الجديدة
س: وما سبب ومناسبة تواجدك بالمكان والزمان سالفي البيان ؟
ج: أنا كنت متجه إلى الحسين وكنت جاي من المطار.
س: من كان برفقتك انذاك ؟
ج: أنا كان معايا أصدقائي فيصل تركي، عبدالله محمد دول سعوديين ومالك صديقي سوري الجنسية.
س: صف لنا تحديدًا كيفية وقوع الحادث ؟
ج: اللي حصل كنت ماشي على الطريق في منتصف الطريق وفجأة لقيتها أمامي وحاولت أتفاداها لكن صدمتها بالسيارة وفضلت ماشي بالعربية لحد ما هديت ووقفت على يسار الطريق ونزلت علشان أطمن عليها.
س: وهل سبق اتهامك في قضايا مماثلة ؟
ج: لأ.
س: انت متهم بالتسبب خطأ في جرح المجني عليها أسراء أحمد بأن كان ذلك ناشئًا عن إهمالك ورعونتك وعدم احترازك وعدم أتباعك للوائح والقوانين بأن اصطدمت بسيارتك، بالمجني عليها فأحدثت بها الإصابات الموصوفة بالتقرير الطبي المرفق وعقب ارتكابك الواقعة عن مساعدة المجني عليها أو طلب المساعدة قمت بالفرار بالسيارة تاركًا إياها بالطريق علي النحو المبين بالتحقيقات ؟
ج: محصلش
س: انت متهم بقيادة السيارة دون حملك رخصة قيادة خاصة صادرة من الإدارة العامة لمرور جمهورية مصر العربية حال كونك حاصل على إقامة مصرية علي النحو الوارد بالأوراق ؟
ج: انا كنت فاكر اني أقدر أمشي بالرخصة السعودية، والغالب على علمي من زمايل كتير ليا سعوديين أنهم بيمشوا بالرخصة بتاعت السعودية، وأنا أول مرة أعرف الموضوع ده".
