أمير مرتضى: لو عقد بن شرقي مستمر بمستواه الحالي هطلعه إعارة
تحدث أمير مرتضى منصور، المشرف العام على الكرة بنادي الزمالك، عن موقف طارق حامد وأشرف بن شرقي من التجديد، وموقف الإدارة من الخسارة أمام الوداد في دوري أبطال إفريقيا.
وقال أمير مرتضى منصور، في تصريحات تليفزيونية، عن تجديد بن شرقي: من الناحية الفنية ممكن نكون مش محتاجينه فنيًا، والزمالك مبيستناش حد، ولو عقد بن شرقي مستمر معانا بمستواه ده هيطلع إعارة مش هقعده مع الفريق.
أمير مرتضى: أعتذر لجمهور الزمالك على النتيجة وسلوك بعض اللاعبين
وأضاف أمير مرتضى: أعتذر لجمهور الزمالك على النتيجة، وأعتذر لهم عن سوء سلوك بعض اللاعبين بعد مباراة اليوم، والجمهور له الحق لما يغضب ميكونش في رد فعل منا كمسئولين أو لاعبين.
وتابع المشرف على الكرة بنادي الزمالك: طارق حامد قال إديني مهلة أصلي استخارة وأرد عليك، والمهلة خلصت ومش هفضل قاعد مستني ومع احترامي لطارق أنا بمثل الزمالك.
وأكمل أمير مرتضى: اسم طارق حامد مع المجموعة؟ عشان منجملش الكلام، اجتمعت معاه الخميس اللي فات في وجود وكيله وقولت له النادي يقدرك ويحترمك وهو قال نفس الكلام، لكن ربط إن في عرض سعودي في الصيف.
وواصل أمير مرتضى: في لاعبين مش حاطين الزمالك أولوية بالنسبة لهم، حاطين الزمالك رقم 2 أو 3، وقرارات رئيس النادي ليست انفعالية.
وأردف المشرف على الكرة بالزمالك: قولت لمستر فيريرا قبل ما يجي إحنا عندنا لاعبين جيدين بس مبقيناش فريق كويس، مش هنضحك على نفسنا.
واختتم أمير مرتضى: الزمالك أكبر من لاعب واخد عرض من الزمالك وحاطه في الدرج وبيشوف عروض تانية، مش عايز أحط الناس في موقف مع الجمهور كفاية اللي كانوا فيه النهار ده.
