حمادة هلال عن أغنية عيش بشوقك: دي غنوتي وكان ممكن أضايق اللي عملها
تحدث الفنان حمادة هلال، عن أغنية عيش بشوقك التي طرحها الفنان تامر حسني في وقت سابق وحققت نجاحًا كبيرًا، موضحًا أنها كانت له في البداية ولكن ذهبت للفنان تامر حسني في نهاية المطاف.
وقال حمادة هلال، في الجزء الثاني من حلقته في برنامج حبر سري، الذي تقدمه المذيعة أسما إبراهيم عبر شاشة قناة القاهرة والناس: الغنوة دي بتاعتي وأنا أشتغلت عليها 6 شهور والمؤلف والملحن عارفين ده كويس، وبعدين اتشغلت في تعب أمي الله يرحمها ولقيت الغنوة راحت في حتة تانية قولتلهم الغنوة دي بتاعتي، قالوا إحنا قرأنا فاتحة مع أحمد علي الملحن.
وتابع حمادة: بعد 15 يوما لقيت إن مفيش حاجة حصلت، كلمتهم وقولتلهم هي الفاتحة دي تمشي على أحمد علي وماتمشيش عليا؟! أنا كان ممكن أزعل اللي عملها وأطلع تاني يوم على السوشيال ميديا بس قولت ليه هعمل كده، يمكن لو عملت كده وحرقت دمهم ممكن ربنا يحرق دمي.. كان المفروض يبقى في تنازل بس الحمد لله، وأنا مش فارق معايا الغنوة.
وأضاف حمادة هلال متحدثًا عن أغنية أشرب شاي: كنت رايح بالصدفة أسلم على مي كساب كانت تعبانة وقابلت أوكا وأورتيجا، قالولي في أغنية اللي هي أشرب شاي ودي أغنية هتفضل تتسمع كتير، ربنا بيعوض والأرزاق بيد الله.
أغنية محمد نبينا
كما تحدث هلال، عن خسارته حملة إعلانية لشركة عالمية بسبب نجاح أغنية محمد نبينا، كما أن هناك من يوصف بالمغني المتدين قائلًا: ممكن تكون في فرص متجيليش بسبب كده، في موقف حصل أن كان المفروض أعمل حملة إعلانية لشركة عالمية واللي أتأكدت منه أن التعاقد متمش بسبب نجاح أغنية محمد نبينا.
