كان بيشرب مخدرات بس اتعافى.. حكاية شاب قتل غدرا ببور فؤاد| فيديو
أجرى القاهرة 24 بثًا مباشرًا مع سيدة سقط أبنها قتيل إثر غدر أحد الأشخاص به في مدينة بور فؤاد، حيث كان الشاب يجلس على إحدى المقاهي ببور فؤاد ليتفاجأ بشخص يقتحم المقهى ويرفع عليه سلاح أبيض «مطواة»، ويصيبه بعدد من الطعنات ليذهب على إثرها للمشفى ويلقى مصرعه هناك.
مقتل شاب ببور فؤاد
قالت والدته: جوزي كان بياع خضار، وابني علي كبر لقى أبوه كده، فكان لازم يشتغل معاه ويكافح، ودا مكانش بيزعجه بالعكس كان راضي وبيقولي أنا مش مضايق يا أمي، لأن ابن الدكتور بيطلع دكتور وأنا ابن بياع وهطلع بياع زي أبويا.
واستكملت السيدة: ابني كانت حياته بسيطة جدا، كان بيجيب البضاعة من سوق الجملة، ويفرشها عند صيدلية قريبة مننا، ويقعد على القهوة اللي جنب الصيدلية يشرب قهوته ويبيع الخضار اللي جابه من السوق، وكنت أقوله لما تيجي تتجوز أنا هاخد قرض كبير عشان أجوزك.
وأضافت والدة علي: قبل كدا راح ابني يخطب واحدة واتفاجأ بحجم طلبات أبوها، من شقة وشبكة وغيره فأضايق، واتلم على أصحاب السوء في منطقتنا، وبعدها عرفت أنه بقي بيشرب مخدرات، ودا سببله أنه يتحبس 15 يوم، وطلع بعدها حرم يشرب أي نوع من أنواع المخدرات.
وأكد عدد من أصدقاء المجني عليه، أنه كان معروفا بين جميع سكان وأهالي مدينة بور فؤاد، بالأخلاق كما أنه دائم السعي على طلب الرزق، ويرفض الدخول في المشاكل من أجل أسرته.
