عمر الشناوي: فكرة التعامل مع الفن على أن الحياة وردية في المجتمع دي نابعة من إيه؟
علق الفنان عمر الشناوي، على الانتقادات التي واجهت فيلم أصحاب ولا أعز، بسبب الألفاظ الخادشة للحياء وشرب الخمور، وفكرة تناوله المثلية الجنسية، وبالإضافة إلى تعرض الفنانة منى زكي لهجوم.
كتب الفنان عمر الشناوي على حسابه الشخصي فيس بوك: هو فكرة التعامل مع الفن على أن الحياة وردية ومفيش مشاكل في المجتمع دي نابعة من إيه؟ أولا في قتلة في وسطنا في حرامية في مختلسين في أفاقين في منافقين في مغتصبين كبار وأطفال في كل حاجة ممكن العقل يتخيلها.
وتابع عمر الشناوي: إنما نيجي على شلة طلع فيها مواضيع خيانة وشرب وواحد مثلي، لا، نعترض ونقول دي مش قيم الشعب المصري طب ليه نتفرج على أفلام فيها جرايم قتل ومابنعترضش هي دي قيمنا إننا نقتل؟ ليه اتفرجنا كلنا على فيلم عصابة حمادة وتوتو وضحكنا؟ هي قيمنا إننا نعمل عصابة ونسرق الناس هل دول بيمثلوا الأسرة المصرية.
وأضاف عمر الشناوي: لا بجد راجعوا نفسكم كده كل الأفلام اللي نشأنا عليها كان فيها بلاوي وماعترضناش وكنا بنتفرج عادي إيه اللي حصل ما أنا هتفرج ليه على فيلم بيحكى عن ناس زي الفل وأخلاقهم جميلة ومفيش صراع؟ فين القصة؟ كان في ناس لذيذة اتعزموا على العشا أكلوا ملوخية وأرانب وروحوا الله فيلم يجنن الصراحة.
أعمال عمر الشناوي المقبلة
ينتظر الفنان عمر الشناوي عرض فيلم 11.11 يوم 2 فبراير، تدور أحداث الفيلم في إطار إثارة وتشويق، والعمل من بطولة إياد نصار، غادة عادل، إنجي المقدم وعدد آخر من الفنانين، وهو من تأليف ياسر عبد الباسط وإخراج كريم أبو زيد.
