رانيا يوسف: اتجوزت منتج ولم يدعمني في التمثيل.. والزواج ملهوش لازمة
تحدثت الفنانة رانيا يوسف، عن مفهوم الزواج بالمجتمعات العربية، بجانب الحديث عن تجربتها بالزواج من منتج، مؤكدة أنه لم يساعدها في أعمالها الفنية.
وقالت رانيا يوسف خلال لقائها مع الإعلامية إنجي أنور، في برنامجها مصر جديدة عبر شاشة: أنا لم اعتمد على زواجي من منتج ومساعدنيش ولا بمكالمة واحدة حتى، وأنا شايفة أن ربنا مش بيضيع مجهود حد وأنا بشتغل بتعب جدا في شغلي؛ لأن اللي بيطلع بسرعة جدا بيقع بسرعة جدا.
وواصلت: مكنتش عايزة أكون موهبة مشكوك فيها والناس تقول دي بتمثل عشان جوزها، وكنت عايزة أبقى ناجحة لأني اشتغلت على نفسي وناجحة بموهبتي.
الزواج في المجتمعات العربية
وأضافت يوسف: أنا قررت أني مش هتجوز تاني، لان الزواج ملهوش لازمة دلوقتي بالذات في المجتمعات العربية، لأن مفهوم الجواز عندنا غلط يعني الناس ببتجوز عشان تخلف أو تعمل علاقة، لأن معندناش مفهوم العلاقات المفتوحة ودا الطبيعي في المجتمعات الشرقية.
وتابعت الفنانة: الزواج في البلاد العربية بيقوم على المصالح أو عائلات بتناسب بعض، وبقى كل اللي بتشوفيه بيكون عايز منك حاجة أو عايز يتشهر، ومفيش حاجة اسمها فتى أو فتاة أحلام دي روايات بتاعت زمان.
واختتمت رانيا حديثها، قائلة: فيه راجل يحترمك ويحترم شغلك وحياتك وخصوصياتك، والاحترام هو اللي بيخليكي تحبي الشخص اللي قدامك، ولو لقيت الراجل اللي بيعملي كل حاجة نفسي فيها بردو مش هتجوز لأني اتعودت أبقى لوحدي، وبقالي 3 سنين مطلقة.
