مشاهير وفنانون يدعمون معلمة المنصورة: مأذتش حد
أعلن العديد من الشخصيات العامة دعمهم لآية يوسف معلمة المنصورة، وذلك بعد إعلانها خبر طلاقها من زوجها بسبب الفيديو المنتشر لها عبر وسائل التواصل الاجتماعي، وهيّ ترقص خلال رحلة مع بعض المدرسين.
وفاء عامر تدعم معلمة المنصورة
ظهرت الفنانة وفاء عامر في بث مباشر عليّ حسابها الشخصي بموقع التواصل الاجتماعي، قائلة: المعلمة اللي رقصت في رحلة هيّ مرقصتش في الفصل، وبالمناسبة مأذنش حد كانت بتتفسح في رحلة فيها مجموعة، مش من المفترض إنها تفضل ماسكة القلم وتكتب طول الوقت.
ثم استكملت حديثها: العامل في أمريكا ينهي ساعات عمله ويذهب للسهر أو إذا كان مسيحيا يذهب إلى الكنيسة، وأيضا إذا كان له ديانة أخرى يذهب إلى المكان المخصص له للعبادة، أو يذهب للسهر.
سمية الخشاب لمنتقدي المعلمة: غيرانين
وكتبت الفنانة سمية الخشاب عبر حسابها الخاص، على تويتر: لو كل إنسان اتلهى في نفسه والله هننهض، حسبي الله ونِعم الوكيل في اللي صورها وخرب بيتها، اشتغلوا بنفسكوا بقى كلكم عيوب والله، الدين مين اللي نزله؟ ربنا ولا البني آدمين؟، ربنا بقى اللي بيحاسب ربنا، مش شوية بني آدمين كلهم غلط وعيوب، صلحوا من نفسكم بدل ما تؤذوا الناس وتخربوا بيوتهم.
وأضافت الخشاب: وأعتقد والله أعلم اللي صورها إما واحدة حاقدة وغيــرانة منها أو واحد مـــريض ونيته سودة وبرضه غيران منها، لو كل واحد يخليه في حاله ويسلك حياته ستتغير للأفضل، فعلًا الجهل كـــارثة كبيرة.
بسمة وهبة: لم تقصر في عملها
قالت الإعلامية بسمة وهبة: كل المصيبة أنها خرجت مع زملائها للتعبير عن سعادتهم ورقصت، لكن في حد خسيس وجبان مسك الموبايل وصوّر واستسلم لشهوة النشر، وفي لحظة تحولت مصر لـ 100 مليون حاكم قرروا يحكموا على المدرسة دي الإعدام، وبدل ما الناس يدافعون عن خصوصيتها ويجرّموا التصوير والنشر دون إذنها وعلمها، قرروا يذبحوها معنويًا عشان كانت بترقص.
وتابعت بسمة وهبة حديثها: الكل يشهد لها بتفوقها وأيضا اجتهادها، ولم تقصر يوما في عملها وكانت تعمل متطوعة.
هيدي كرم باكية: ليه نعمل كل ده؟
دعمت الفنانة هيدي كرم المعلمة عبر حسابها على انستجرام، قائلة: بقالنا يومين في قصة عجيبة غريبة من نوعها وكلنا بنتفرج عليها وساكتين، مش بنعمل أي رد فعل، معلمة المنصورة الست دي كانت في رحلة نيلية مع زملائها اللي بقالها سنين معاهم يمكن تعرف زوجاتهم وعيالهم كمان، الست سمعت شوية مزيكا وتمايلت شوية على المزيكا دمرتوها ضيعتوا مستقبلها.
ثم استكملت حديثها، باكية: ليه نعمل كل ده فيها كلنا ممكن تنحط في نفس الموقف ده ومحدش بيسمي على حد، حتى الصحافة بتوصفها غلط، ومحدش فكر في الستر، تركنها على جنب لما يبقى فيها تقطيع لحم الناس ونميمة.
وأضافت هيدي كرم: أنا معرفش اسمك بس بدعمك أرجوكي كوني قوية، متخليش حاجة تكسرك، أنتي ست محترمة ومحدش له حاجة عندك، عملتي حاجة قدام الناس وسط نور ربنا، أزمة وهتعدي.
وتعمل أية يوسف معلمة وانتشر لها فيديو عبر مواقع التواصل الاجتماعي، وهيّ في رحلة نيلية ترقص مع زملائها ثم بعد ذلك بدأ الهجوم عليها بشكل كبير مما وضعها أمام مساءلة قانونية.
