معنديش مانع ألحن مهرجانات وعمرو دياب مبيسألش عليَّ وكنت بازوَّغ من حليم.. أبرز تصريحات هاني شنودة في واحد من الناس
حل الموسيقار الكبير هاني شنودة ضيفا على الإعلامي عمرو الليثي، في برنامج واحد من الناس، المذاع عبر قناة الحياة، وخلال اللقاء كشف العديد من أسرار حياته، كما تحدث عن بدايته في عالم الموسيقى، وقصة اكتشافه للهضبة عمرو دياب، كما تحدث عن أغانيه مع الكينج محمد منير، وعن تعاونه مع المطربة نجاة الصغيرة في العديد من الأعمال الفنية.
ونستعرض لكم في هذا التقرير، أبرز تصريحات هاني شنودة، في برنامج واحد من الناس.
ـ عمرو دياب مبيسألش عليَّ خالص وأنا مش زعلان منه.. هو مشغول عنده جيم وسبا.
ـ لا ابني بيسأل علي ولا بنتي، ولو ضربولي تليفون يبقى فيه مشكلة.. بابا هات فلوس، ألحق دا إحنا حصلنا كذا.. فالحمد لله ما دام مبيكلمونيش يبقى كل حاجة كويسة.
ـ لو الهضبة يقبل إن إحنا نخطي اللي حصل، ونعمل حاجة جديدة ومتقدمة مع بعض، فأنا معنديش أي مانع.
هاني شنودة وعمرو دياب
ـ أغنية عمرو دياب الأخيرة مش زي اللي قبل كده، لأن عمرو عنده ميزة لما اتصور بالفانلة الحمالات ناس كتير زعلت وأنا سقفت له.
ـ عبد الحليم حافظ كان يحرص على متابعة عزفي، كان بيعزمني على الغداء، وأنا كنت بزوغ منه، ولو الكلام ده حصل دلوقتي كنت هروح له برموش عيني.
ـ أنا باحب أغاني المهرجانات، ولكن بشرط أن تكون كلماتها مناسبة، ومعنديش مانع ألحنها.
ـ معندناش في المزيكا نوت موسيقية مؤدبة أو قليلة الأدب.
ـ ليه مفيش مهرجانات عاطفية، وطنية أو دينية؟
هاني شنودة في برنامج واحد من الناس
ـ أنا من محبي أوكا وأورتيجا، وأي شخص له جمهور يُسمى فنانا مهما كان ما يقدمه.
ـ موسيقى الراب عبارة عن أشعار تُغنّى على موسيقى إفريقية، ولا يصح للنقابة أن تقول ده مطرب.
ـ الأستاذ نجيب محفوظ كان له دور كبير في تأسيس فرقة المصريين.
ـ رفضت أن أشارك في إحدى أغانى أم كلثوم.
ـ نجاة الصغيرة كانت معجبة بالفنان محمد منير، كانت بتيجي تقف تحت شباك بيتي، ولو سمعت لحن حلو تروح ضاربة الجرس، وتقول أنا اللي أغنيه ودي حاجة تحسب لها لأنها صيادة.
ـ كان فيه أغنية اسمها مزامير، عجبت نجاة الصغيرة وطلبتها قلت لها لأ دي بتاعة محمد منير، قالتلي أعرض عليه أغنيها معاه.
ـ محمد منير لا يحتاج إلى تصريح مني، لغناء أعمال.. أعمالي كلها رهن منير.
