والدة بسنت خالد ضحية الصورة المفبركة: ناري مش هتبرد غير بالقصاص
ناري مش هتبرد غير بالقصاص العادل وحق ربنا.. بنبرة أم حزينة مكلومة على فراق ابنتها، دخلت والدة الطالبة بسنت خالد، ضحية الصور المفبركة بالغربية، في نوبة من البكاء على وفاة ابنتها عقب تناولها حبة الغلة السامة، وذكرت أنها عندما رأت الصور المفبركة شعرت بذهول كبير، كما أن البعض كان يتحدث عن هذه الصور، وكثرة الأحاديث في هذا الأمر أوجعها كثيرًا.
والدة بسنت: أنا كنت متأكدة أنها مش بنتي
وتابعت والدة الضحية بسنت خالد خلال حوارها في برنامج تفاصيل، مع الإعلامية نهال طايل، على صدى البلد: الصورة وجعتني بس أنا كنت متأكدة أنها مش بنتي وأن الصور متفبركة، كان لدي 3 أبناء توفوا منهم ولدين كان لديهم سنتين وابن توفي في حادث عن عمر 9 سنوات، ودي رابعة واحدة من ولادي تموت.
وأضافت والدة ضحية الابتزاز، أنه لم يكن هناك في المنزل حبة غلة من الأساس، ولكن ابنتها اشترتها للتخلص من حياتها، وعندما وجدت ابنتها في حالة قيء، توجهوا على الفور إلى المستشفى وتم عمل غسيل معدة، متابعة: بسنت فاقت شوية وكلمتنا.. وفي آخر مكالمة قبل الفجر قالتلي أنا كلت وشربت، خدي إنتى علاجك وكلي وهرجعلك الصبح وعشان خاطري خدي علاجك، أنا مشوفتش الرسالة اللي كتبتها غير بعد وفاتها.
شميت ريحة الحباية السامة وخدتها في حضني
وأشارت إلى أنها ردت على ابنتها بأنها لن تأكل ولن تشرب إلا بعد الاطمئنان عليها، مردفة: لما طلع النهار جريت على المستشفى، لقيت بنتي في حالة ميؤوس منها، ودخلوها العناية المركزة، بس عرفت أن مفيش أمل لما شوفتها آخر مرة، ولما قربت منها شميت ريحة الحباية السامة وخدتها في حضني، موضحة أنها على يقين أن تلك الصور ليست لابنتها فالفبركة كانت واضحة، وتم وضع وجه ابنتها على صورة فتاة أخرى لديها جسم غير ابنتي.
بسنت كانت من المتفوقين وحافظة القرآن الكريم
وتابعت: بنتي انهارت لما الصور دي كانت موجودة بس أنا هديتها وقولتلها أنا مصدقاكي، بسنت كانت من المتفوقين وحافظة القرآن الكريم وهي كانت ملاك ماشي على الأرض، ودايما مكانتش بتتكلم وكانت بتكتم في نفسها، ومتشتكيش أبدا وأي حاجة كانت مضايقة بنتي مكانتش بتقولي عشان مضايقنيش، موضحة أن أبناء عمها هم من أبلغوها بواقعة الصور، جسم اللي في الصورة كبير ومش جسم بنتي ولكن تم وضع وجه ابنتي عليه.
عايزة القصاص العادل وحق ربنا
واستكلمت: وناري مش هتبرد غير بالقصاص العادل، وأنا أعرف واحد من اللي فبرك الصور، والتاني ماعرفوش واللي أعرفه عنهم إن عيلتهم مفككة، أنا عايزة القصاص العادل وحق ربنا، بنتي كانت حافظة القرآن وبتطلع من الأوائل وكانت عايزة تبقى دكتورة وقلتلها هاتي مجموع كبير، وسيبى الباقي على ربنا ثم علينا، وأي حد كان بيناديلها على المذاكرة كانت تقول أنا غيرت اسمي محدش ينده عليا.
