نضال الشافعي: أنا مش بطل عظيم عشان نجوت من المرض.. وأستعد لعمل كوميدي

تحدث الفنان نضال الشافعي عن وعكته الصحية، كما كشف نضال عن أجدد أعماله، وعن الفنانين المفضلين بالنسبه له.

وقال نضال الشافعي في تصريح خاص لـ القاهرة 24: مقدرش أقول إني بطل عظيم عشان نجوت من المحنة دي، بس أقدر أقول إنه كان اختبار من عند ربنا، وربنا كان عظيم ولطيف وساعدني أعدي المحنة دي اللي أنا كنت فيها، ودلوقتي أنا في وسطيكوا وسعيد أني رجعت لشغلي وجمهوري والناس المحبين..الحمدلله.

وواصل نضال: تجسيدي للأدوار الشريرة مش الأفضل، بس يمكن أدوار الشر كان ليها قاعدة ومشاهدة أكتر، ومع ذلك الكوميدي كان ناجح جدا، مثلا مسلسل تامر وشوقية كانوا 5 أجزاء ونجح، وناجي عطا الله، وكان فيه شوية أعمال أنا فخور وسعيد بيها ونفسي أعمل كوميدي تاني وبإذن الله هيكون في حاجة كوميدي قريبا.

وأضاف نضال: أنا بهدي أي جائزة أخدتها قبل كدا لممثلين الأبيض والأسود لأن هما المدرسة الأولى اللي اتعلمنا منها وكانوا فعلا يستاهلوا الأوسكار وعظماء، ومش في أدوار الشر بس إنما في كل حاجة، ولولا أن الواحد كان بيقعد يتفرج عليهم مكنش هيحب المهنة دي، ومن الناس العظماء اللي بعشقهم أستاذ زكي رستم، محمود المليجي، عادل أدهم، توفيق الدقن، سابوا بصمة في التمثيل. 

وتحدث نضال عن فيلمه الجديد 9 مللي، قائلا: فيلم 9 مللي في مرحلة التحضير، ومن تأليف أحمد وهيثم الدهان وأتمنى أنه يكون عند حسن ظن الناس، ويكون عمل جيد، وبحاول أنوع في شخصياتي وأعمل أدوار مختلفة عن الحاجات اللي عملتها قبل كدا.

آخر أعمال نضال الشافعي

والجدير بالذكر، أن آخر أعمال نضال هي حكاية 90 يوم من مسلسل ورا كل باب، وذلك بعد غياب دام لفترة طويلة بسبب إصابته بانفجار بإحدى الزوائد القولونية، نتيجة انفعاله على منتج فيلم ميني بار. 

وحكاية 90 يوم من تأليف منة الفقي، وإخراج أحمد صالح، وشارك في الحكاية كل من ميمي جمال، دنيا عبد العزيز، أحمد حلاوة، وعفاف رشاد.