السيسي: عمرك ما هتحقق نجاح وأنت مستريح.. إحنا في عالم متغير وعنيف
يشهد الرئيس عبدالفتاح السيسي، رئيس الجمهورية، افتتاح مصنع كيما أسوان 2 لإنتاج اليوريا ونترات الأمونيا.
وأردف الرئيس عبدالفتاح السيسي، رئيس الجمهورية، خلال كلمته منذ قليل: نحن نعتبر وجودنا في المؤتمرات دي بمثابة منصات للناس تستفيد منها والإعلام أيضًا، والكلام بتاع وزير الزراعة إن ري فدان القصب بالتنقيط أو بالشتل أوحجم العائد بتاع ايه؟.. هكلم المزارع اللي عنده فدان أو اثتين أنت عندك خيارات تعظم دخلك لو سمعت كلامنا وهنساعدك، عمرك ما هتحقق نجاح وأنت مستريح.. وبقول الكلام ده للجميع.. إن ارتحت مفيش مكسب؛ لأننا في عالم متغير عنيف مفيهوش مكان غير اللى بيشتغل ودماغه في شغله وفي حاله ومحتاله.
وتابع: «بدل ما يكون الإنتاج 80 ألف طن يكون 100 ألف طن، ولما شوفت ترعة توشكى خلال أسبوع الصعيد سألت هل يمكن وضع سمك فيها وهل يعملوا مشكلة للري، قولوا لا، طب انت فاكر توشكى تقدر ترمى فيها سمك لمدة سنة و2 ويبقى عائد كويس، هتجيبوه إزاى وتنقلوا ازاي، لما بكلم قدام الناس، اهتموا بلدكم وخافوا علينا.. الفرص موجودة.. وربنا سبحانه وتعالى، مفيش عصفورة قالته لو طلعت هتاكلني ولا، بتطلع وتلاقي رزقها،وده مخلوق ضعيف وربنا بيرزقنا، ولازم نجرى على رزقنا، ومفيش فرصة لحاجة زي كده والا لما تتعمل.
كما أشار الرئيس السيسي، إلى عام 2011، في كلمته، قائلًا: أنا لن أنسى 2011 والمفروض يا مصريين متنسوهاش في كل إجراء بتعملوه وكل خطوة بتتحركوها.. ربنا وحده اللي أنقذكم من الخراب والدمار وربنا أنقذنا لخاطر الـ 100 مليون في مصر.
وصرح السفير بسام راضي المتحدث الرسمي باسم رئاسة الجمهورية، بأن الرئيس عبد الفتاح السيسي، سيقوم بتفقد مصنع اليوريا ونترات الأمونيا بمنطقة كيما بمحافظة أسوان، اليوم، كما سيقوم أيضًا بتفقد محطة سكك حديد أسوان، حيث يشهد تدشين الوحدات المتحركة الجديدة بمختلف أنواعها من قاطرات وعربات السكك الحديدية.
وجدير بالذكر، أن الرئيس عبدالفتاح السيسي، افتتح أمس الاثنين 5 مشروعات قومية واستراتيجية بقطاع الكهرباء والطاقة المتجددة بمحافظات صعيد مصر، في مقدمتها مشروع مجمع بنبان للطاقة الشمسية أكبر مجمع محطات لتوليد الكهرباء النظيفة في الشرق الأوسط، والذي تم إنشاؤه بالشراكة مع القطاع الخاص والخبرات الدولية المتخصصة، ويعد أحد أهم مشاريع البنية التحتية في مصر لتوليد الكهرباء من الطاقة الجديدة والمتجددة.
