محمد ممدوح عن نادين خان: موهوبة ومخلصة.. أكتر واحدة تعبت في فيلم أبو صدام
تحدث الفنان محمد ممدوح، عن المخرجة نادين خان، مخرجة فيلمه أبو صدام، الذي شارك في المسابقة الرسمية لمهرجان القاهرة السينمائي بدورته الـ 43، كما حصل ممدوح على جائزة أحسن ممثل من المهرجان عن دوره بالفيلم.
وقال محمد ممدوح، عن المخرجة نادين خان، خلال حديثه مع الإعلامي يوسف الحسيني، في برنامج التاسعة، عبر شاشة قناة الأولى: هي موهوبة جدا وشاطرة جدا ومخلصة جدا، أكتر واحدة تعبت في الفيلم ده نادين خان، من أول الكتابة، كان في صعوبات كتير أوي، اللي هي كانت عايزة تطلعه على الورق ده صعب، لأن الأحرى إن نخلي الناس تفكر، مش نطلع الموضوع بشكل مباشر، ونلعب مع الناس نوريهم حكاية، أو حالة هنقدمها إزاي، ده عايز إخلاص وشكل مطور.
وتابع محمد ممدوح: أعتقد إن من أهداف الفن إن أخلي دماغ الناس تشتغل، احترم عقلية المتفرج، مش هفرجه على الحاجة اللي عايزها هي هي، طب أنا استفدت إيه، وأعتقد نادين عملت كده في فيلم أبو صدام، قعدوا يكتبوا كذا مرة وبتاخد آراء كل الناس، كان في صعوبات إداريا إنها ماسكة كل طاقم العمل، بالعالم بتاع سواقة التريلا إحنا قعدنا مع أسطوات كبار.
وأضاف: كان عالم صعب، عشان تقتنع هي بالعالم ده، وتقنعهم إنها ست وبتتكلم معاهم وإن هي اللي دايرة الموضوع ده كان واخد وقت ومجهود، وهما كانوا محترمين جدا وعاملوها باحترام، هما المهنة خشنة جدا بيقعدوا على الطريق 20 يوم بينقلوا نقلات 40 طن، وقوانينهم قاسية جدا.
كما أشاد بدور أحمد داش في فيلم أبو صدام، خلال حديثه قائلا: أحمد داش عمل دور عظيم، عامل التباع بتاع أبو صدام، كان حلو جدا وكان فاهم وواعي ومخلص جدا في العمل.
وفيلم أبو صدام، بطولة الفنان محمد ممدوح، أحمد داش، رجب، علي قاسم، علي الطيب، هديل حسن، قصة وإخراج نادين خان، سيناريو وحوار محمود عزت، مدير التصوير عبد السلام موسى، ملابس ريم العدل، ديكور عاصم علي، مونتير باهر رشيد، موسيقى شريف ثروت.
