سيدة فقدت 3 من أولادها في ثلاث ساعات: السيول وقعت السقف عليهم
قصة مأساوية لسيدة فقدت 3 من أولادها خلال 3 ساعات، بسبب الأمطار الغزيرة، والتي تسببت في سقوط سقف المنزل عليهم، ليذهب الثلاثة أطفال ضحية إهمال صاحب العقار.
تروي منى أحمد، والدة الأطفال، تفاصيل القصة خلال حديثها مع الإعلامي عمرو الليثي، المذاع عبر فضائية الحياة: كنا قاعدين أنا ووالدتي وأخواتي وجدتي، وكان عندي محمد 9 سنين ومرام ومروان توأم 5 سنين و4 شهور، قلت لهم كل واحد يقعد على كنبة من الثلاثة.
وتابعت منى: سمعت صوت خبط جامد، مكملتش مدخل البيت، وسمعت أمي بتقول لأخويا: العيال وستك، شوفت تراب جامد طالع من البيت، جريت على البيت وزحفت لجوه عشان أشوف في إيه، ماما طلعت بره وحاجة سدت بينا وبينهم.
وأضافت الأم: أمي قعدت تصوت، وأنا مش عارفة في إيه، ولقيت الشباب في العزبة كلها دخلوا جوه البيت وقعدوا يقولوا اطلعوا البيت بيقع، لحد ما طلعوا ستي حية ترزق، وطلعوا محمد والمطرة مطرت ثم مروان والمطرة مطرت ثم دوروا على مرام، وبعدين روحت المستشفى والتلاتة طالعين ميتين.
وأكملت الأم: من المغرب لبعد العشاء، قعدوا يدوروا عليهم، ومرضيوش يستخدموا أدوات، عشان ميأذوش الأولاد، واللي حصل ده من السيول، اللي وقعت سقف السطح والشقة والأرضي.
واستطردت حديثها قائلة: مكناش متوقعين أن البيت بيقع، يا دوب خرجت من باب الشقة ومرة واحدة لقينا البيت كله وقع، وصاحب البيت مرضيش ينفذ القرار عشان يتنكس، وقلت لهه هطلع من البيت ورممه وإدينا شقة مكانها فرفض.
