لولا شريف عرفة ووحيد حامد مكنتش هكون هنا.. كلمة كريم عبد العزيز لحظة تكريمه بمهرجان القاهرة
أعرب الفنان كريم عبد العزيز، عن سعادته بعد تسلمه جائزة فاتن حمامة للتميز، بالدورة الـ 43 من مهرجان القاهرة السينمائي الدولي، بعدما قدمته صديقته الفنانة منى زكي.
وقال كريم عبد العزيز، بعد تسلمه الجائزة على المسرح الكبير بدار الأوبرا المصرية، منذ قليل: بحمد ربنا إنه وفقني إني أوصل للمكان هنا، وكذلك أسرتي على رأسهم أبويا وأستاذي وصديقي ووالدتي وكانت المفروض تبقى معانا ولكن حصل ظروف، عايز أشكر كمان زوجتي اللي تحملتني 15 سنة.
وتحول المسرح الكبير بدار الأوبرا لساحة مشتعلة بالحماس، حينما ذكر كريم عبد العزيز اسم والده المخرج الكبير محمد عبد العزيز.
وأضاف كريم عبد العزيز: أنا فرحت النهارده لـ 3 أسباب، الأول إني بتكرم من مهرجان بعراقة مهرجان القاهرة السينمائي الدولي، اللي بيحمل اسم بلدنا ومن أهم المهرجانات في المنطقة العربية بالكامل، والسبب الثاني الاسم المنحوت على اسم الجائزة شرف وتقدير إني أمسك جائزة عليها اسم فاتن حمامة، والسبب الثالث مفاجأتي وفرحتي إن اللي قدمتني منى زكي، أنا عايز أقول أنا مكنش حد ينفع يقدمني غير منى زكي، وأول مرة وقفت قدام كاميرا كانت سنة 97 مع منى زكي.
وتابع كريم عبد العزيز: إحنا أصحاب وأخوات وديمًا بقولها شكرًا الموهوبة بزيادة، وبحمد ربنا إننا جيل اتربى على يد أساتذة علمونا نحترم الفن والشغلانة ونحترم الناس عشان الناس تحترم هذه الصناعة العظيمة، وفيه أسماء لولاها أنا مكنتش هبقى واقف قصاد حضراتكم، أول جملة حوار قولتها للعظيم الراحل وحيد حامد، والرجل التاني هو اللي بكلمة صغيرة منه حياتي تروح يمين أو شمال، وهو المخرج شريف عرفة، كل سنة وانتو طيبين ومنورين ومتجمعين.
