المرض الملعون دمرني.. أبرز ما قالته الراحلة أسماء مصطفى عن السرطان
رحلت عن عالمنا منذ قليل الإعلامية أسماء مصطفى، بعد صراع طويل مع مرض السرطان، والتي أعلنت عن إصابتها به منذ شهر إبريل الماضي، مؤكدة أنها كانت حريصة على إخفاء هذا الخبر عن أصدقائها وعائلتها لعدم رغبتها في إحزانهم.
وكانت الإعلامية الراحلة أسماء مصطفى، توضح مستجدات حالتها الصحية عبر حسابها الشخصي بموقع التواصل الاجتماعي فيس بوك، حيث كانت تروي تفاصيل تجربتها مع مرض السرطان، فقالت: السرطان ده طلع حكاية ورواية ومحطات وأماكن دون كتالوج حتى قوتك وحربك في المعركة طلعوا بردوا مش واحد، هو لعنة فكل الأوقات بس حتى اختبارات المعركة طلعت بردو دون كتالوج، مش يعني اللي بيحارب جوه الميدان غير اللي في وش المعركة غير اللي واقف على الحدود.. سبحان الله له في ذلك حكم، أمال مين يتعلم من مين ونقيس تجاربنا إزاي، ونفيد بعض إزاي.. مفيش كتالوج أنت ورزقك أنت واختبارك وربنا عارف صبر وقوة كل واحد علشان كده محدش مقياس لحد.
وكتبت أسماء منشورًا في وقت سابق، دعت من خلاله لوالدتها قائلة: من أصعب الابتلاءات في الحياة إن الأم تشوف حتة منها ومن كيانها تعبان وبيتألم قدامها وهي مش قادرة تعمله حاجة، الضنا غالي أنا بدعي لنفسي بالشفا وبدعي لأمي بالصبر، وربنا يثبت قلبها. بقول يا رب زي ما رددت سيدنا موسى لأمه كي تقر عينها ولا تحزن ردني لأمي بالصحة والعافية كي تقر عينها ولا تحزن.
وتابعت أسماء: أنا حاسة بوجعها ووجع كل أم عندها ابتلاء في حد من أولادها، ادعوا لأمي ولكل أم بالصبر والفرج وفك الكرب.. عارفة إن صعب عليها تشوفني كده قدامها صعب أقوى ومش هتكلم عن علاقتنا دلوقتي بس هي أمي وصاحبتى وأختي وبنتي أنا منها وهي مني.. يا رب فرح قلبها وصبرها.
كما سبق وأن وجهت رسالة شكر لزوجها، والتي أعربت عن حبها الشديد له، خاصة أنه ساندها خلال مرحلة مرضها ورحلة علاجها، فكتبت: أمي ربنا يديها العمر والصحة ويصبرها على ابتلائها فيه قبل ما أتجوز لأني كنت برفض ناس كتير كل ما كانت تسألني كنت أقولها عايزة أتجوز راجل بيحبني بجد لنفسي.
وأضافت الإعلامية أسماء مصطفى: كانت تدعي وتقولي ربنا يرزقك باللي يقدرك ويريح قلبك يكون ابن أصول، عمرها ما اتمنت ليا عريس يجبيلي مثلا شبكة بكام ولا هسكن ولا حاجة خالص زي ما بيحصل، ولا طلبت غير راحة بالي وحد يقدرني.. وربنا سبحانه وتعالى استجاب دعوتنا إحنا الاثنين رزقني براجل بجد بيحبني لنفسي ولشخصي وبيقدرني والمحنة والمرض خلوني أفتكر دعوتها.. المرض الملعون ده دمرني لكن هو شايفني أحلى ست في الدنيا، ولاقيته ضهري وسندي في دنيتي، ربنا يحميه ويحفظه ويكفيه شر الحاسدين، ويبارك في أولادنا ويحفظهم ونقدر نعدي المحنة ونخرج بمنحة يا رب صبرنا على ابتلاءنا.
