برنامج سهرانين يتبرع بمبلغ لمعهد الأورام باسم المذيعة لينا شاكر
أعربت المذيعة لينا شاكر، عن سعادتها الشديدة، بعد ما أعلن الفنان أمير كرارة بأن برنامج سهرانين، تبرع بمبلغ لـ معهد الأورام باسم لينا شاكر، وأنه ستكون هناك لوحة شرف باسمها حتى تكون نموذجا للآخرين، بعد ما انتصرت على مرض السرطان.
وروت شاكر، تفاصيل رحلتها العلاجية من مرض السرطان، حيث حلت ضيفة بصحبة إلهام شاهين وهالة صدقى في الجزء الثانى من برنامج سهرانين، الذي يقدمه الفنان أمير كرارة، عبر شاشة قناة ON، قائلة: اكتشفت حاجة وروحت أكشف وكل التقارير طلعت إنه مش ورم خبيث وحجزوا لى إني أعمل عملية.
وتابعت شاكر: بدأت قصص طويلة مع العلاج بالكيماوي والإشعاعي، وطبعا اتخضيت في الأول ووقتها قولت لنفسي حاجة واحدة إن أنا مش أحسن من أي حد بيجيله مرض أو يمر بمحنة من ربنا، وقلت خلاص لازم أكون قوية بإيماني بربنا وصبري وأهلي وحبايبي اللي بيحبوني كانوا داعم كبير ليا.
وأضافت المذيعة لينا شاكر: أول حد عرف إني مصابة بمرض السرطان كان الإعلامى شريف مدكور، ومكنتش عاوزة حد يعرف والموضوع كان صعب عليا إني أقوله لأهلي بس كمان جه وقت لازم يعرفوا، وأنا مريت بالتجربة قبل كدة مع والدتي لمدة 12 سنة أثناء إصابتها بمرض السرطان، وكمان عيشت التجربة مع شريف مدكور وكنت معاه برده في رحلته.
واستكملت: المحنة اللى مريت بيها كانت سبب إني شرحت كل حاجة في منشور على الفيس بوك وجلسة التصوير دون شعر وقولت أكيد في حكمة من محنة ربنا عليا، وفعلا في ناس كتير كلمتني كان عندهم نفس التجربة وقالولي إن روحهم المعنوية ارتفعت بسبب اللي كتبته، وتلقيت الكثير من الدعاء من كل الناس وبجد عاوزة أشكرهم.
وقالت الفنانة إلهام شاهين: العلم تقدم عن زمان ومرض السرطان بقى زي أمراض تانية عادي ممكن تتعالج لأن أعرف حالات كتير ربنا شفاها منه، وأنا عملت ده في حكاية حتة مني، من حكايات مسلسل زي القمر وحققت نجاح، وكويس إن بقى في ناس بتتعافى من مرض السرطان في 8 أشهر فقط.
وأضافت الفنانة هالة صدقي: إحنا مش عاوزين نقلل من أي مرض، لأن مثلا كورونا مش كل الناس شفيت منه، ولكن الأهم إننا نبادر بالكشف أول ما نشعر بآلام لأننا دايما نقول عندنا برد عندنا صداع ومش بنروح نكشف، وكمان الدولة عاملة مبادرة عظيمة وكل عربيات وزارة الصحة في الشواره ممكن الناس تكشف وتتطمن، وبشكر اهتمام الدولة بمجال الصحة والمجهود الكبير إلى عملاه الفترة الأخيرة.
