هالة صدقي: تركت معهد الفنون المسرحية بسبب كرم مطاوع.. حسيت إنه بيعجزني
كشفت الفنانة هالة صدقي، أنها تركت المعهد العالي للفنون المسرحية، بسبب الفنان الراحل كرم مطاوع، والذي كان يدرس لها وقتها، موضحة أنها شعرت أنه يطلب منها تمثيل أدوار لا يمكن تمثيلها بالواقع.
وقالت هالة صدقي خلال حلقتها مع الفنان أمير كرارة في برنامجه سهرانين، الذي يقدمه عبر شاشة قناة ON: أنا كنت بحب كرم مطاوع حب فظيع، فقالي قومي أعملي شجرة، وقالي أنا مش عايز الشكل، أنا عايز المضمون بتاع الشجرة، وبعدين أنا حسيت إنه بيعجزني وزعلت جدا، وروحت لزوزو نبيل الله يرحمها كنت بعمل معاها مسلسل، وقولتها مدام زوزو هو يعني إيه أشعة ويعني إيه شجرة.
وتابعت: قالتلي لأ مفيش حاجة اسمها تمثلي شجرة، وبعدين جيت عملت مع الفنان كرم مطاوع مسلسل المفروض إنها قصة حب، وأنا عندي عادة لو زعلانة من حد مبعرفش أبص في عينه، وأول مشهد كان بيني وبينه والمخرج بيقولي بصي له، وأنا بقول وأنا كمان بحبك وكنت ببص الناحية التانية خالص، المخرج قالي بصي في عينه، قولتله مش قادرة أبص له وانهارت من العياط.
وأضافت: وقفنا تصوير ونزلنا، قولت لأستاذ كرم مطاوع، أنا زعلانة منك جدا لأنك أنت خلتني أسيب المعهد، أنا كان نفسي أكمل، وسألته أنت ليه عملت معايا كدة؟، قالي أنا بقولك عشان أخلي وجدانك وتخيلك يوصل لأبعد حد، يعني كان له وجهة نظر، بعد كدة بقى حبيبي، وعملنا مسلسل آرابيسك ونجح أوي وقتها.
