محيي إسماعيل: قلبت جنازة عبد الحليم حافظ لمظاهرة والمخرج شال صوتي
تحدث الفنان محيي إسماعيل، عن كواليس أعماله الفنية، والتي تناولها في كتاب من تأليفه بعنوان تعقيدات النفس البشرية، خلال لقائه مع الفنانة إسعاد يونس في برنامجها صاحبة السعادة، عبر شاشة قناة DMC.
وقال محيي إسماعيل إن أخطر لقطة اتعملت في تاريخ السينما كانت في جنازة عبد الحليم حافظ، والتي حضرها من أجل تصوير مشهد في فيلم المليون كومبارس: المخرج محمد راضي قالي الداخلية مانعة إنك تطلع بمظاهرة، روحت لشكري سرحان وقولتله أنا هدخل جنازة عبد الحليم حافظ وهقلبها مظاهرة، قالي هتعمل كده إزاي، روحت الجنازة وقولت لواحد ارفعني على كتفتك عشان أهتف باسم عبد الحليم، وأول ما شالني ورفعت إيدي وبدأت أهتف كله رفع إيده وبقى يهتف، راح محمد راضي شال الصوت وحط مكانه موسيقى، ونزله باسم المليون كومبارس، ده كان أهم مشهد في حياتي.
كما أعرب محي إسماعيل عن استيائه من القنوات الفضائية بسبب عدم عرض أعماله قائلا: معظم أعمالي مبشوفهاش في معظم القنوات الفضائية، تعرفي إن أنا عملت بطولة 16 مسلسل، و20 فيلم، ومفيش حاجة فيهم بتتعرض، القنوات الفضائية في تعتيم على أعمالي.
وتابع خلال حديثه: أنا كنت بدرس فلسفة وبعد ما عملت الأخوة الأعداء قررت أكتشف العبث والعقد، وركزت فيها وكل المخرجين ساعدوني، قعدت لغاية ما تعمقت وعملت كتاب ال 17 عقدة.
