مي كساب: زي القمر عوضي الفني والإنساني عن 11 سنة غياب
أعربت الفنانة مي كساب، عن معاناتها وما مرت به من أزمات خلال الفترة الماضية، والتي امتدت إلى 11 عاما، حيث كتبت منشورا؛ روت خلاله ما يدور في خاطرها بتلك اللحظة، الأمر الذي جعل الجمهور يتفاعل معها بشكل كبير.
وكتبت كساب، عبر حسابها الشخصي بموقع التواصل الاجتماعي فيس بوك، أنها بعدما خضعت للعزل المنزلي خلال الفترة الماضية بسبب إصابتها بفيروس كورونا، جعلها ترى الأمور بنظرة أخرى، وتدرك قيمة من حولها، قائلة: الكام يوم اللي فاتو كانوا أطول مده أقعدها لوحدي في حياتي، وبعترف شفت الحقيقة الكاملة.. حقيقة نفسي.. حقيقة كل حاجة نحوا، وعرفت قيمة كل حاجة، وندمت على كل لحظة ظلمت فيها نفسي أو ظلمت حد من اللي بحبهم وبيحبوني.
وتابعت: اللي بتكتب دلوقتي مي بس بتاعة 2010 بس بمخ العشرين سنة اللي اشتغلت فيهم، ونجحت وأخفقت بسبب ظروف وأوضاع اتفرضت عليا.. بس الحمد لله راضية تمام الرضا على كل ابتلاء، وكل مشكله اتحطيت فيها، لأن في الآخر ربنا سبحانه وتعالى كان بيحلهالي عشان أقدّر نعمه.
وأوضحت مي، أنها كانت تعاني طوال 11 عاما، قائلة: أنا عدى عليا 11 سنة صعبين جدًا يمكن القريبين مني عارفين أنا استحملت إيه وواجهت إيه.. أنا مسحت كل لحظة مش عاوزة أشوفها تاني عشان بتفكرني إني كنت مش أنا، وسببت كل لحظة وكل صورة بتعبر عني وعن اللي جوايا وعن أكتر حاجات مأثرة جوابا كفنانة وكإنسانة، ومسحت كل صوري العائلية ولو إن دي مش أنا لحد ما أرجع أنا، وأسجل لحظاتي الحلوة مع عيلتي الجميلة.. أكبر نعمة من رب العالمين.. جوزي وأولادي وأهلي وأصحابي وزملائي رفاق الرحلة الأوفياء الصادقين.. السند والضهر اللي خلاني أعرف أعدي الـ 11 سنة دول.
مسلسل زي القمر
وأشارت إلى أن حكاية عقبال عوضك، من مسلسل زي القمر، يمثل مكانة كبيرة لديها لما حققه من نجاح باهر وقت عرضه، قائلة: بعترف عقبال عوضك كان عوضي الفني والإنساني بعد صبر 11 سنة، حبيت أفضفض معاكم وأطلع اللي في قلبي عشان دي أنا بأحكي اللي جوايا.. عشان نيتي بتكون إن اللي مريت بيه يكون مفيد لغيري، ويتعلم منه حاجه تأثر فيه وتغيره للأحسن، وبإذن الله العلي الكريم أنا هرجع أنا، وهحارب وأقاوم كل روح شريرة، وكل طاقة سلبية أثرّت عليَ في السنين اللي فاتت، وربنا يقدرني وأكون إنسانة صالحة وفنانة صاحبة رسالة، وأكون خير في الدنيا بحبكم من قلبي وحقيقي حبكم ليه هو الحياة.
