سبها ميتة 3 أيام.. القصة الكاملة لمقتل زوجة على يد زوجها بالدقهلية
وصلات تعذيب تعرضت لها سيدة عشرينية على يد زوجها داخل منزل الزوجية بقرية نشأ التابعة لمركز نبروه في محافظة الدقهلية، حيث ضرب الزوج زوجته وربطها بالجنزير لرفضها أخذ قرض له.
وكشفت والدة نوسة ضحية تعذيب زوجها خلال بث مباشر على القاهرة 24، تفاصيل الواقعة، قائلة: أنا بنتي متزوجة منذ نحو 14 سنة، وتعرضت منذ زواجها إلى جميع أشكال التعذيب على يد زوجها.. كان دايما بيضربها وبيحبسها وقبل الواقعة بأيام قام بحلق شعرها بالكامل.
وأضافت: بنتي كانت دائمآ بتشكي من زواجها وكانت نفسها تتطلق ولكن مكنش لديها مسكن آخر فخافت على أولادها، وكانت بتشتغل في جميع الأعمال حتي تكفي بيتها لأنه مكنش بيصرف علي البيت وبيطلبها يوميا أنها تتدفعله 300 جنيه ثمن المخدرات التي كان بيشربها، وكان جزائها في النهاية القتل بالشكل البشع ده.
وتابعت: أنا عرفت الواقعة الساعة 3 الفجر بإتصال من شقيقة المتهم، قالت لي بنتك عملت حادثة، وعلى الفور ذهبت للمستشفى أشوف في إيه واكتشفت إنها ماتت وبيقولوا إنها كانت راكبة في تروسيكل وعملت حادثة، لكن الطب الشرعي أفاد أنها ميتة من نحو 3 أيام وإنها متعذبة ومضروبة ومقيدة بالجنزير من الإيد والرجل وكان منظرها صعب وده كله بسب أنها رفضت أخد قرض لأنها كانت مديونية ومتورطة في قضية سابقة بسب موضوع القروض.
واختمت: أنا بطلب بحق بنتي.. القصاص العادل.. هي مكنتش تستحق الموتة دي وحسبي الله ونعم الوكيل.
في سياق متصل، قالت شقيقتها: أختي كانت بتتعب وتشقى وكان بياخد فلوسها علشان يشرب مخدرات.. حسبي الله ونعم الوكيل منظر أختي في المشرحة مش قادرة انساه.. إحنا غلابة وملناش حد وبنطلب القصاص العادل.
وناشد أحد الجيران المسؤولين، توفير مسكن للأم ومحامي يتولى القضية، مبررًا: دول ناس غلابة ومش لاقيين أي حاجة ويمكن اللي حصل ده بسب إنهم غلابة.
