عمرو أديب: ما حدث في كفر الشيخ أمر كارثي.. ويجب غلق السناتر كلها
علق الإعلامي عمرو أديب، على حملة اللواء جمال نور الدين، محافظ كفر الشيخ، وعمرو البشبيشي، نائب محافظ كفر الشيخ، لغلق الدروس الخصوصية، حيث تمكن من غلق 7 سناتر دروس خصوصية.
قال أديب عبر برنامجه الحكاية المُذاع عبر فضائية "mbc مصر"، مساء الأحد، إن ما حدث في كفر الشيخ أمر كارثي، وهذا غير معقول خصوصا في ظل أزمة كورونا، مضيفًا: الزحام الموجود غير مقبول لو حد عطس كله هيتعدي دول قاعدين مترين في متر.
أضاف أديب: انتوا رايحين تعملوا أيه الدراسة لسه مجاتش، هل دا معقول يا جماعة فين أولياء أموركم، انتوا مش صغيرين، المحافظ رايح بنفسه عشان يقفل السناتر دي والدولة عمالة تصرف مليارات عشان تطوير التعليم، والفلوس رايحة لحد تاني رايحة لتحت الأرض.
تابع: المنظر اللي بنشوفه دا ولا السينما، وطبعا كله مكسوف وكله بيغطي وشه لما الكاميرا صورتهم، طيب ليه بنعمل كده يا جماعة ايه الإدمان للسناتر والدروس الخصوصية، يا جماعة مافيا.. أشك أن فيه حاجة زي كده في العالم، مفيش في العالم زي مصر هي ظاهرة مصرية صرف موضوع السناتر دا، حرام والله مجهود وفلوس ضايعة.
وطالب الإعلامي عمرو أديب المحافظين في مصر، بالتشديد ومراقبة السناتر والدروس الخصوصية الموجودة في كل محافظة، والتعامل مثل اللواء جمال نور الدين.
وقرر المحافظ غلق 7 "سناتر" للدروس الخصوصية، مشددًا على تطبيق القانون بكل حزم، حفاظًا على صحة المواطنين.
