مراد مكرم بعد أزمة ابنة هبة قطب: "صداع كل سنة ولو مكان حاطط قواعد نروح ليه؟!"
علق الفنان مراد مكرم، على الفتاة التي مُنعت من نزول حمام السباحة بسبب ارتدائها مايوه شرعي، حيث وقعت ضحية التنمر.
وكتب مراد في منشور عبر حسابه بـ "فيس بوك": “مصر كبيرة قوي يا جماعة، ما هياش أوضة وصالة علشان كل سنه نفس الخناقات والصعبانيات والكره والشتيمه، مصر فيها آلاف الكيلومترات من الشواطئ الجميله وآلاف بل ملايين حمامات السباحه، ليه ما يتمش تقسيم الشواطئ إلى شواطئ للبوركيني وشواطئ للمايوهات العاديه.. إيه اللي يمنع يعني بدل صداع كل سنة ده”.
وتابع مراد مكرم قائلًا: “معظم الفنادق بالذات في المنتجعات عندها أكتر من حمام سباحة، تخصص منهم للبوركيني ومنهم للمايوه العادي وخلاص.. إيه المشكلة!.. وبعدين لو مكان حاطط لنفسه قواعد، هو حر، ليه نروحله ما دام لا تنطبق علينا الشروط.. لو مكان عام حقك تعترضي بس ما دام مكان خاص من حقه يحط القواعد إلى شايفها في مصلحة مكانه”.
وأضاف مراد مكرم: “ومن حقك تقاطعيه.. قصة قصيرة حزينة حصلت من كام سنه في شبرا ومعظم الشبراويه سمعت عنه.. أحد المطاعم إلى اكتشفنا بعد كده أن مالكه اخواني، كتب على المحل مطلوب عمال وموظفين وتحتها المسيحيين يمتنعون.. والكلام وصل للبابا شنودة في اجتماعه الأسبوعي.. من غير ولا تشنج ولا عصبية ولا كلام كتير، البابا رد وقال إلى مش عايزنا مش عايزينه”.
مراد مكرم يعلق على أزمة المايوه البوركيني مع ابنة هبة قطب:
واستكمل مراد منشوره: “وبكل بساطة عدت بضعة شهور وقفل المطعم لصاحبه الغبي لأنه عمل عداوه مع نص سكان شبرا وجزء كبير من النص التاني إلى مش متربي على التفرقة.. وعدت السنين وقفل خالص في مصر تقريبًا”.
وأضاف مراد مكرم في منشوره: “الحياة فيها من المشاكل الحقيقيه ما يكفينا وزيادة.. كفايه هري بقي في الموضوع ده، الحلول موجودة للي عايز يفكر في حل”.
وأختتم مراد مكرم منشوره قائلًا: “طبعًا الصح أن كل واحد حر ما لم يضر بأحد.. بس ده ممكن يبقي حل مؤقت لحين تغيير المزاج العام المصري إلى قبول الاختلاف وقبول الآخر دون تعالي من طرف ضد الآخر”.
