"اختفى ووالدته قالت إن أمن الدولة قبض عليه".. ننشر أقوال حماة سفاح الجيزة (خاص)
حصل "القاهرة 24" على نص التحقيقات في القضية التى حملت رقم 3066 لسنة 2021 جنايات قسم شرطة بولاق الدكرور، والمقيدة برقم 5612 لسنة 2021 جنايات قسم الهرم، كلي جنوب الجيزة والمتهم فيها "قذافي فراج" الشهير بسفاح الجيزة.
وأحال النائب العام المستشار حمادة الصاوي، مساء الاثنين الماضي، المتهم إلى محكمة الجنايات في أربع قضايا بدوائر الهرم وبولاق الدكرور بالقاهرة والمنتزه بالإسكندرية؛ لمعاقبته فيما نُسب إليه من قتله عمدًا أربعة -هم زوجته وسيدتان ورجل- مع سبق الإصرار خلال عامي 2015، 2017، وإخفائه جثامينهم بدفنها في مقابر أعدها لذلك.
وينشر القاهرة 24 في هذه الحلقة، أقوال "ثريا أحمد على عثمان"، والدة كل من زوجة سفاح الجيزة "فاطمة"، وشقيقتها "نادين" التي اتهمته النيابة بقتلها ومازالت مختفية حتى الآن. س: ما صلتك بالمجنى عليها نادين السيد سيد على؟ ج: هى بنتى. س: ما صلتك بالمتهم قذافى فراج عبد العاطى؟ ج: هو جوز بنتى فاطمة. س: متى تحديدا تزوجت نجلتك من المتهم قذافى فراج عبد العاطى؟ ج: هما كتبوا الكتاب فى يوم 30/3/2015 واتجوزوا فى أغسطس 2015 وأنا معايا صورة قسيمة الجواز ومعايا إيصال حجز الفرح. س: هل أنجبت نجلتك من المتهم قذافى فراج عبد العاطى؟ ج: أيوة خلفت منه نادين واكتشفت بعد كدا أن اسمها حبيبة لما كنا بنستخرج شهادة ميلاد ليها. س: ما هو سلوك المتهم غضون فترة الزيجة بنجلتك؟ ج: هو جالى كذا مرة فى شهر ديسمبر 2014 يتقدم لبنتى فاطمة وأنا رفضت وبعد فترة وافقنا علشان هو راجل محترم وكان بداية جوازة كان كويس وفى شهر نوفمبر 2015 بدأت أنا وبنتى فاطمة نتعب جامد ونخش المستشفى والدكاتره بيقولوا أن أنا فى تسمم أنا وفاطمة بعد ما كانوا مش عارفين. س: هل تواصلتم مع ثمة أحد ممن كان برفقة المجنى عليها نادين عقب خروجها من المسكن أنذاك؟ ج: هو كان قذافى بيقولنا أن هو اللى بيتواصل مع المنتج ومش عاوز يدينا رقمه. س: متى تحديدا تم اختفاء المجنى عليها نادين؟ ج: هى بنتى نزلت من البيت عندنا يوم 13/3/2015. س: من كان برفقتها وقام باصطحابها من مسكنكم انذاك؟ ج: هو كان قذافى والمنتج اللى اسمه قنبض وشريف يوسف سواق قذافى وكان فى بنتين كمان منهم واحدة اسمها سناء. س: هل ليكى ثمه بيانات لسالفى الذكر الذين قاموا باصطحاب المجنى عليها؟ ج: لا. س: ما هى الملابس التى كانت ترتديها المجنى عليها انذاك؟ ج: هى كانت لابسة حجاب وعباية سودة وتحتهم بنطلون جينز وتيشيرت وجزمة بكعب وشنطة فى أيديها. س: هل تواصلت معكم المجنى عليها نادين عقب خروجها من المسكن؟ ج: هو كان فى مكالمات بتيجى منها كل فترة بس كان صوتها بيبقى متغير كتير وكل مرة بتقولنا تعبانة واختفت مرة واحدة. س: متى تحديدا تم إرسال تلك الرسائل وقمتم باستقبال تلك المكالمات الهاتفية؟ ج: هو كان بعد ما خرجت بفترات مش قادرة أحددها لحد تقريبا من سنتين ثلاثة وقفت مكالمات. س: هل نمى إلى علمك عما إذا كان تلك المكالمات من شخص المجنى عليها نادين؟ ج: هو حسينا أن صوتها متغير ولما سألناها مال صوتك قالت أصل أنا تعبانة. س: ما هى بيانات الأرقام التى كانت تتواصل معاكم؟ ج: هو كان فى أرقام خاصة مش بتظهر كانت بتقول أن دى أرقام دولية. س: هل قمتم بالاستعلام عما إذا كان المجنى عليها قد غادرت جمهورية مصر العربية أو قمتم باستخراج شهادة تحركات لها؟ ج: لا احنا تايهين ومش عارفين نتصرف ازاى. س: هل ثمة حوار دار بينك وبين المتهم عقب قيامه بتوصيل نجلتك على نحو ما قررته بتحقيقات النيابة العامة؟ ج: هو قالنا أنه وصل نادين للمطار. س: هل تحصلت المجنى عليها على ثمة أموال من المتهم أو من كان برفقته انذاك؟ ج: هى الراجل السورى اللى كان مع قذافى إداها عشرة آلاف جنيه. س: هل لديك ثمة -أوراق- و عقود تم تحريرها آنذاك؟ ج: لا هما خدو كل حاجة معاهم عشان نادين مسافرة. س: هل تم الاتفاق على مدة السفر بذلك العقد؟ ج: هما قالوا إن هما أول ما يخلصوا تصوير هى هترجع. س: صفي لنا المجني عليها تحديدا؟ ج: هى كانت عينيها خضرا وشعرها أصفر وكانت بيضاء اللون وكانت طيبة وعمرها مازعلت حد. س: هل بحوزتك بطاقة تحقيق شخصية المجنى عليها؟ ج: لا هى أخدت كل حاجة معاها البطاقة والباسبور. س: ما هى طبيعة عمل المجنى عليها؟ ج: هى كانت فى كلية حقوق جامعة بنها وكانت بتشتغل فى الإعلانات جنب دراستها. س: هل تواصلتم مع أحد من أصدقاء المجنى عليها عقب خروجها؟ ج: هو محدش يعرف عنها حاجة. س: هل لدى المجنى عليها حساب على أيا من مواقع التواصل الاجتماعى؟ ج: معرفش. س: متى بدأت الخلافات بينك وبين المتهم تحديدا؟ ج: هو مكنش فى خلافات بس هو لما اختفى فى شهر أكتوبر 2016 اكتشفنا أنه نصب علينا وسرقنا وفى فترة أنا وبنتى تعبنا وكانوا بيقولوا عندنا تسمم وبعد لما اكتشفنا أنه نصب علينا شكينا أنه ممكن هو اللى كان بيسممنا. س: هل قام المتهم بوضع ثمة مواد سامة أو مخدرة لكى؟ ج: ايوة بعد لما اكتشفنا أنه نصب علينا وسرق فلوسنا شكينا أنه ممكن هو اللى كان بيسممنا بعد لما اختفى. س: ما هى مدة إصابتك انت ونجلتك بالتسمم؟ ج: شهور بس بعد لما اختفى احنا ارتحنا. س: بكم تقدر الأموال التى قام المتهم بسرقتها؟ ج: هو سرق فلوس من البيت واخد فلوس يشغلها حوالى نص مليون جنيه وسرق دهب بنتى. س: ما سبب قيامكم بإعطاء المتهم تلك المبالغ المالية المبينة قدرا بالتحقيقات؟ ج: هو كان بيقول لجوزى يشاركه وكان بياخد فلوس عشان يشغلها بس اكتشفنا انه اخد كل حاجة واختفى. س: متى تحديدا آخر مرة قمتِ بالتواصل مع المتهم؟ ج: هو اختفى يوم 9/10/2016 وأمه بلغتنا إن أمن الدولة قبض عليه. س: هل تواصلتى مع أهلية المتهم انذاك؟ ج: ايوة انا كنت بتكلم مع والدته وكانت بتقولى إنه اتقبض عليه. س: ما قولك فيما قرره المتهم قذافى فراج عبد العاطى بتحقيقات النيابة العامة من قيامه بقتل ابنتك المجنى عليها نادين؟ ج: انا باتهمه بقتل نادين وإخفائها. س: ما قولك فيما قرره المتهم قذافى فراج عبد العاطى بتحقيقات النيابة العامة من أن المجنى عليها نادين كانت ترغب فى الزواج منه؟ ج: الكلام دا محصلش واحنا كنا رافضين يتجوز بنتى فاطمة أصلا وهو جه كتير يزن عليا وبنتى نادين كانت جميلة وصغيرة. س: ما هو قصد المتهم من ارتكاب الواقعة؟ ج:هو قصدة يقتل نادين بنتى. س: هل لديك أقوال أخرى؟ ج: لا.
التحقيقات تكشف دور منتج سوري في إحدى جرائم سفاح الجيزة (مستندات)
"التحقيقات" تكشف علاقات سفاح الجيزة الجنسية (خاص)
"كنت بحل مشاكلي بالقتل وقتلت أربعة بالسم".. نواصل نشر نص تحقيقات سفاح الجيزة (انفراد)
وجبة غداء وقبر داخل الشقة.. ننشر أمر إحالة سفاح الجيزة للجنايات (مستندات)
"استخدمت اسم رضا عشان أهرب من تهمة قتل مراتي".. ننفرد بنشر نص تحقيقات "سفاح الجيزة" (مستندات)
